១០. ឧក្ខិត្តបទុមិយត្ថេរអបទានំ

១២៩. ‘‘នគរេ ហំសវតិយា, អហោសិំ មាលិកោ តទា;

ឱគាហេត្វា បទុមសរំ, សតបត្តំ ឱចិនាមហំ.

១៣០. ‘‘បទុមុត្តរោ នាម ជិនោ, សព្ពធម្មាន បារគូ;

សហ សតសហស្សេហិ [សតសហស្សសិស្សេហិ (ក.)], សន្តចិត្តេហិ តាទិភិ.

១៣១. ‘‘ខីណាសវេហិ សុទ្ធេហិ, ឆឡភិញ្ញេហិ ឈាយិភិ [សោ តទា (សី.), សោ សហ (ក.)];

មម វុទ្ធិំ សមន្វេសំ, អាគច្ឆិ មម សន្តិកំ [មម សន្តិកេ (សី.), បុរិសុត្តមោ (ស្យា. ក.)].

១៣២. ‘‘ទិស្វានហំ ទេវទេវំ, សយម្ភុំ លោកនាយកំ;

វណ្ដេ ឆេត្វា សតបត្តំ, ឧក្ខិបិមម្ពរេ តទា.

១៣៣. ‘‘យទិ ពុទ្ធោ តុវំ វីរ, លោកជេដ្ឋោ នរាសភោ;

សយំ គន្ត្វា សតបត្តា, មត្ថកេ ធារយន្តុ តេ.

១៣៤. ‘‘អធិដ្ឋហិ មហាវីរោ, លោកជេដ្ឋោ នរាសភោ;

ពុទ្ធស្ស អានុភាវេន, មត្ថកេ ធារយិំសុ តេ.

១៣៥. ‘‘តេន កម្មេន សុកតេន, ចេតនាបណិធីហិ ច;

ជហិត្វា មានុសំ ទេហំ, តាវតិំសមគច្ឆហំ.

១៣៦. ‘‘តត្ថ មេ សុកតំ ព្យម្ហំ, សតបត្តន្តិ វុច្ចតិ;

សដ្ឋិយោជនមុព្ពិទ្ធំ, តិំសយោជនវិត្ថតំ.

១៣៧. ‘‘សហស្សក្ខត្តុំ ទេវិន្ទោ, ទេវរជ្ជមការយិំ;

បញ្ចសត្តតិក្ខត្តុញ្ច, ចក្កវត្តី អហោសហំ.

១៣៨. ‘‘បទេសរជ្ជំ វិបុលំ, គណនាតោ អសង្ខិយំ;

អនុភោមិ សកំ កម្មំ, បុព្ពេ សុកតមត្តនោ.

១៣៩. ‘‘តេនេវេកបទុមេន, អនុភោត្វាន សម្បទា;

គោតមស្ស ភគវតោ, ធម្មំ សច្ឆិករិំ អហំ.

១៤០. ‘‘កិលេសា ឈាបិតា មយ្ហំ, ភវា សព្ពេ សមូហតា;

នាគោវ ពន្ធនំ ឆេត្វា, វិហរាមិ អនាសវោ.

១៤១. ‘‘សតសហស្សិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ឯកបទុមស្សិទំ ផលំ.

១៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧក្ខិត្តបទុមិយោ ថេរោ ឥមា គាថាយោ អភាសិត្ថាតិ.

ឧក្ខិត្តបទុមិយត្ថេរស្សាបទានំ ទសមំ.

គន្ធោទកវគ្គោ ចតុតិំសតិមោ.