៨. ឧត្តរេយ្យទាយកត្ថេរអបទានំ

៩០. ‘‘នគរេ ហំសវតិយា, អហោសិំ ព្រាហ្មណោ តទា;

អជ្ឈាយកោ មន្តធរោ, តិណ្ណំ វេទាន បារគូ.

៩១. ‘‘បុរក្ខតោ សសិស្សេហិ, ជាតិមា ច សុសិក្ខិតោ;

តោយាភិសេចនត្ថាយ, នគរា និក្ខមិំ តទា.

៩២. ‘‘បទុមុត្តរោ នាម ជិនោ, សព្ពធម្មាន បារគូ;

ខីណាសវសហស្សេហិ, បាវិសី នគរំ ជិនោ.

៩៣. ‘‘សុចារុរូបំ ទិស្វាន, អានេញ្ជការិតំ វិយ;

បរិវុតំ អរហន្តេហិ, ទិស្វា ចិត្តំ បសាទយិំ.

៩៤. ‘‘សិរស្មិំ អញ្ជលិំ កត្វា, នមស្សិត្វាន សុព្ពតំ;

បសន្នចិត្តោ សុមនោ, ឧត្តរីយមទាសហំ.

៩៥. ‘‘ឧភោ ហត្ថេហិ បគ្គយ្ហ, សាដកំ ឧក្ខិបិំ អហំ;

យាវតា ពុទ្ធបរិសា, តាវ ឆាទេសិ សាដកោ.

៩៦. ‘‘បិណ្ឌចារំ ចរន្តស្ស, មហាភិក្ខុគណាទិនោ;

ឆទំ ករោន្តោ អដ្ឋាសិ, ហាសយន្តោ មមំ តទា.

៩៧. ‘‘ឃរតោ និក្ខមន្តស្ស, សយម្ភូ អគ្គបុគ្គលោ;

វីថិយំវ ឋិតោ សត្ថា, អកា មេ [អកាសិ (ស្យា.)] អនុមោទនំ.

៩៨. ‘‘បសន្នចិត្តោ សុមនោ, យោ មេ អទាសិ សាដកំ;

តមហំ កិត្តយិស្សាមិ, សុណោថ មម ភាសតោ.

៩៩. ‘‘‘តិំសកប្បសហស្សានិ, ទេវលោកេ រមិស្សតិ;

បញ្ញាសក្ខត្តុំ ទេវិន្ទោ, ទេវរជ្ជំ ករិស្សតិ.

១០០. ‘‘‘ទេវលោកេ វសន្តស្ស, បុញ្ញកម្មសមង្គិនោ;

សមន្តា យោជនសតំ, ទុស្សច្ឆន្នំ ភវិស្សតិ.

១០១. ‘‘‘ឆត្តិំសក្ខត្តុំ រាជា ច, ចក្កវត្តី ភវិស្សតិ;

បទេសរជ្ជំ វិបុលំ, គណនាតោ អសង្ខិយំ.

១០២. ‘‘‘ភវេ សំសរមានស្ស, បុញ្ញកម្មសមង្គិនោ;

មនសា បត្ថិតំ សព្ពំ, និព្ពត្តិស្សតិ តាវទេ.

១០៣. ‘‘‘កោសេយ្យកម្ពលិយានិ [កោសេយ្យកម្ពលីយានិ (សី.)], ខោមកប្បាសិកានិ ច;

មហគ្ឃានិ ច ទុស្សានិ, បដិលច្ឆតិយំ នរោ.

១០៤. ‘‘‘មនសា បត្ថិតំ សព្ពំ, បដិលច្ឆតិយំ នរោ;

ឯកទុស្សស្ស វិបាកំ, អនុភោស្សតិ សព្ពទា.

១០៥. ‘‘‘សោ បច្ឆា បព្ពជិត្វាន, សុក្កមូលេន ចោទិតោ;

គោតមស្ស ភគវតោ, ធម្មំ សច្ឆិករិស្សតិ’.

១០៦. ‘‘អហោ មេ សុកតំ កម្មំ, សព្ពញ្ញុស្ស មហេសិនោ;

ឯកាហំ សាដកំ ទត្វា, បត្តោម្ហិ អមតំ បទំ.

១០៧. ‘‘មណ្ឌបេ រុក្ខមូលេ វា, វសតោ សុញ្ញកេ ឃរេ;

ធារេតិ ទុស្សឆទនំ, សមន្តា ព្យាមតោ មម.

១០៨. ‘‘អវិញ្ញត្តំ និវាសេមិ [អវិញ្ញត្តានិ សេវាមិ (?)], ចីវរំ បច្ចយញ្ចហំ;

លាភី [លាភិម្ហិ (ស្យា.)] អន្នស្ស បានស្ស, ឧត្តរេយ្យស្សិទំ ផលំ.

១០៩. ‘‘សតសហស្សិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, វត្ថទានស្សិទំ ផលំ.

១១០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧត្តរេយ្យទាយកោ ថេរោ ឥមា គាថាយោ អភាសិត្ថាតិ.

ឧត្តរេយ្យទាយកត្ថេរស្សាបទានំ អដ្ឋមំ.