៧. តិណកុដិទាយកត្ថេរអបទានំ

៧៤. ‘‘នគរេ ពន្ធុមតិយា, អហោសិំ បរកម្មិកោ;

បរកម្មាយនេ យុត្តោ, បរភត្តំ អបស្សិតោ.

៧៥. ‘‘រហោគតោ និសីទិត្វា, ឯវំ ចិន្តេសហំ តទា;

ពុទ្ធោ លោកេ សមុប្បន្នោ, អធិការោ ច នត្ថិ មេ.

៧៦. ‘‘កាលោ មេ គតិំ [កាលោ គតិំ មេ (សី. ស្យា.)] សោធេតុំ, ខណោ មេ បដិបាទិតោ;

ទុក្ខោ និរយសម្ផស្សោ, អបុញ្ញានញ្ហិ បាណិនំ.

៧៧. ‘‘ឯវាហំ ចិន្តយិត្វាន, កម្មសាមិំ ឧបាគមិំ;

ឯកាហំ កម្មំ យាចិត្វា, វិបិនំ បាវិសិំ អហំ.

៧៨. ‘‘តិណកដ្ឋញ្ច វល្លិញ្ច, អាហរិត្វានហំ តទា;

តិទណ្ឌកេ ឋបេត្វាន, អកំ តិណកុដិំ អហំ.

៧៩. ‘‘សង្ឃស្សត្ថាយ កុដិកំ, និយ្យាទេត្វាន [និយ្យាតេត្វាន (សី.)] តំ អហំ;

តទហេយេវ អាគន្ត្វា, កម្មសាមិំ ឧបាគមិំ.

៨០. ‘‘តេន កម្មេន សុកតេន, តាវតិំសមគច្ឆហំ;

តត្ថ មេ សុកតំ ព្យម្ហំ, កុដិកាយ សុនិម្មិតំ [តិណកុដិកាយ និម្មិតំ (សី.)].

៨១. ‘‘សហស្សកណ្ឌំ សតភេណ្ឌុ, ធជាលុ ហរិតាមយំ;

សតសហស្សនិយ្យូហា, ព្យម្ហេ បាតុភវិំសុ មេ.

៨២. ‘‘យំ យំ យោនុបបជ្ជាមិ, ទេវត្តំ អថ មានុសំ;

មម សង្កប្បមញ្ញាយ, បាសាទោ ឧបតិដ្ឋតិ.

៨៣. ‘‘ភយំ វា ឆម្ភិតត្តំ វា, លោមហំសោ ន វិជ្ជតិ;

តាសំ មម ន ជានាមិ, តិណកុដិកាយិទំ [តិណកុដិយិទំ (ក.)] ផលំ.

៨៤. ‘‘សីហព្យគ្ឃា ច ទីបី ច, អច្ឆកោកតរច្ឆកា [តរច្ឆយោ (ស្យា. ក.)];

សព្ពេ មំ បរិវជ្ជេន្តិ, តិណកុដិកាយិទំ ផលំ.

៨៥. ‘‘សរីសបា [សិរិំសបា (សី. ស្យា.), សរិំសបា (ក.)] ច ភូតា ច, អហី កុម្ភណ្ឌរក្ខសា;

តេបិ មំ បរិវជ្ជេន្តិ, តិណកុដិកាយិទំ ផលំ.

៨៦. ‘‘ន បាបសុបិនស្សាបិ, សរាមិ ទស្សនំ មម;

ឧបដ្ឋិតា សតិ មយ្ហំ, តិណកុដិកាយិទំ ផលំ.

៨៧. ‘‘តាយេវ តិណកុដិកាយ, អនុភោត្វាន សម្បទា;

គោតមស្ស ភគវតោ, ធម្មំ សច្ឆិករិំ អហំ.

៨៨. ‘‘ឯកនវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, តិណកុដិកាយិទំ ផលំ.

៨៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិណកុដិទាយកោ ថេរោ ឥមា គាថាយោ អភាសិត្ថាតិ.

តិណកុដិទាយកត្ថេរស្សាបទានំ សត្តមំ.