៩. បុប្ផច្ឆត្តិយត្ថេរអបទានំ

៧៣. ‘‘សិទ្ធត្ថស្ស ភគវតោ, លោកជេដ្ឋស្ស តាទិនោ;

សច្ចំ បកាសយន្តស្ស, និព្ពាបេន្តស្ស បាណិនោ.

៧៤. ‘‘ជលជំ អាហរិត្វាន, សតបត្តំ មនោរមំ;

បុប្ផស្ស ឆត្តំ កត្វាន, ពុទ្ធស្ស អភិរោបយិំ.

៧៥. ‘‘សិទ្ធត្ថោ ច លោកវិទូ, អាហុតីនំ បដិគ្គហោ;

ភិក្ខុសង្ឃេ ឋិតោ សត្ថា, ឥមំ គាថំ អភាសថ.

៧៦. ‘‘‘យោ មេ ចិត្តំ បសាទេត្វា, បុប្ផច្ឆត្តំ អធារយិំ;

តេន ចិត្តប្បសាទេន, ទុគ្គតិំ សោ ន គច្ឆតិ’.

៧៧. ‘‘ឥទំ វត្វាន សម្ពុទ្ធោ, សិទ្ធត្ថោ លោកនាយកោ;

ឧយ្យោជេត្វាន បរិសំ, វេហាសំ នភមុគ្គមិ.

៧៨. ‘‘វុដ្ឋិតេ នរទេវម្ហិ, សេតច្ឆត្តម្បិ វុដ្ឋហិ;

បុរតោ ពុទ្ធសេដ្ឋស្ស, គច្ឆតិ ឆត្តមុត្តមំ.

៧៩. ‘‘ចតុន្នវុតិតោ កប្បេ, យំ ឆត្តំ អភិរោបយិំ;

ទុគ្គតិំ នាភិជានាមិ, បុប្ផច្ឆត្តស្សិទំ ផលំ.

៨០. ‘‘ចតុសត្តតិកប្បម្ហិ, អដ្ឋ ជលសិខា អហូ;

សត្តរតនសម្បន្នា, ចក្កវត្តី មហព្ពលា.

៨១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បុប្ផច្ឆត្តិយោ ថេរោ ឥមា គាថាយោ អភាសិត្ថាតិ.

បុប្ផច្ឆត្តិយត្ថេរស្សាបទានំ នវមំ.