១០. សបរិវារឆត្តទាយកត្ថេរអបទានំ

៨២. ‘‘បទុមុត្តរោ លោកវិទូ, អាហុតីនំ បដិគ្គហោ;

អាកាសេ ជលវុដ្ឋីវ វស្សតេ [វស្សតិ (សី. ស្យា.), វស្សេតិ (?)] ធម្មវុដ្ឋិយា.

៨៣. ‘‘តមទ្ទសាសិំ សម្ពុទ្ធំ, ទេសេន្តំ អមតំ បទំ;

សកំ ចិត្តំ បសាទេត្វា, អគមាសិំ សកំ ឃរំ.

៨៤. ‘‘ឆត្តំ អលង្កតំ គយ្ហ, ឧបគច្ឆិំ នរុត្តមំ;

ហដ្ឋោ ហដ្ឋេន ចិត្តេន, អាកាសេ ឧក្ខិបិំ អហំ.

៨៥. ‘‘សុសង្គហិតយានំវ, ទន្តោវ សាវកុត្តមោ;

ឧបគន្ត្វាន សម្ពុទ្ធំ, មត្ថកេ សម្បតិដ្ឋហិ.

៨៦. ‘‘អនុកម្បកោ ការុណិកោ, ពុទ្ធោ លោកគ្គនាយកោ;

ភិក្ខុសង្ឃេ និសីទិត្វា, ឥមា គាថា អភាសថ.

៨៧. ‘‘‘យេន ឆត្តមិទំ ទិន្នំ, អលង្កតំ មនោរមំ;

តេន ចិត្តប្បសាទេន, ទុគ្គតិំ សោ ន គច្ឆតិ.

៨៨. ‘‘‘សត្តក្ខត្តុញ្ច ទេវេសុ, ទេវរជ្ជំ ករិស្សតិ;

ពាត្តិំសក្ខត្តុញ្ច រាជា, ចក្កវត្តី ភវិស្សតិ.

៨៩. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៩០. ‘‘‘តស្ស ធម្មេសុ ទាយាទោ, ឱរសោ ធម្មនិម្មិតោ;

សព្ពាសវេ បរិញ្ញាយ, និព្ពាយិស្សតិនាសវោ’.

៩១. ‘‘ពុទ្ធស្ស គិរមញ្ញាយ, វាចាសភិមុទីរិតំ;

បសន្នចិត្តោ សុមនោ, ភិយ្យោ ហាសំ ជនេសហំ.

៩២. ‘‘ជហិត្វា មានុសំ យោនិំ, ទិព្ពំ យោនិំ [ទេវយោនិំ (សី.), ទិព្ពយោនិំ (ស្យា.)] មជ្ឈគំ;

វិមានមុត្តមំ មយ្ហំ, អព្ភុគ្គតំ មនោរមំ.

៩៣. ‘‘វិមានា និក្ខមន្តស្ស, សេតច្ឆត្តំ ធរីយតិ;

តទា សញ្ញំ បដិលភិំ, បុព្ពកម្មស្សិទំ ផលំ.

៩៤. ‘‘ទេវលោកា ចវិត្វាន, មនុស្សត្តញ្ច អាគមិំ;

ឆត្តិំសក្ខត្តុំ ចក្កវត្តី, សត្តកប្បសតម្ហិតោ.

៩៥. ‘‘តម្ហា កាយា ចវិត្វាន, អាគច្ឆិំ [អគញ្ឆិំ (?)] តិទសំ បុរំ;

សំសរិត្វានុបុព្ពេន, មានុសំ បុនរាគមិំ.

៩៦. ‘‘ឱក្កន្តំ មាតុកុច្ឆិំ មំ, សេត្តច្ឆត្តំ អធារយុំ;

ជាតិយា សត្តវស្សោហំ, បព្ពជិំ អនគារិយំ.

៩៧. ‘‘សុនន្ទោ នាម នាមេន, ព្រាហ្មណោ មន្តបារគូ;

ផលិកំ ឆត្តមាទាយ, សាវកគ្គស្ស សោ តទា.

៩៨. ‘‘អនុមោទិ មហាវីរោ, សារិបុត្តោ មហាកថី;

សុត្វានុមោទនំ តស្ស, បុព្ពកម្មមនុស្សរិំ.

៩៩. ‘‘អញ្ជលិំ បគ្គហេត្វាន, សកំ ចិត្តំ បសាទយិំ;

សរិត្វា បុរិមំ កម្មំ, អរហត្តមបាបុណិំ.

១០០. ‘‘ឧដ្ឋាយ អាសនា តម្ហា, សិរេ កត្វាន អញ្ជលិំ;

សម្ពុទ្ធំ អភិវាទេត្វា, ឥមំ វាចំ ឧទីរិយិំ.

១០១. ‘‘សតសហស្សិតោ កប្បេ, ពុទ្ធោ លោកេ អនុត្តរោ;

បទុមុត្តរោ លោកវិទូ, អាហុតីនំ បដិគ្គហោ.

១០២. ‘‘តស្ស ឆត្តំ មយា ទិន្នំ, វិចិត្តំ សមលង្កតំ;

ឧភោ ហត្ថេហិ បគ្គណ្ហិ, សយម្ភូ អគ្គបុគ្គលោ.

១០៣. ‘‘អហោ ពុទ្ធោ អហោ ធម្មោ, អហោ នោ សត្ថុសម្បទា;

ឯកច្ឆត្តស្ស ទានេន, ទុគ្គតិំ នុបបជ្ជហំ.

១០៤. ‘‘កិលេសា ឈាបិតា មយ្ហំ, ភវា សព្ពេ សមូហតា;

សព្ពាសវេ បរិញ្ញាយ, វិហរាមិ អនាសវោ.

១០៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សបរិវារឆត្តទាយកោ ថេរោ ឥមា គាថាយោ អភាសិត្ថាតិ.

សបរិវារឆត្តទាយកត្ថេរស្សាបទានំ ទសមំ.

ឧមាបុប្ផិយវគ្គោ តេត្តិំសតិមោ.