៨. សុមនាវេឡិយត្ថេរអបទានំ

៦៤. ‘‘វេស្សភុស្ស ភគវតោ, លោកជេដ្ឋស្ស តាទិនោ;

សព្ពេ ជនា សមាគម្ម, មហាបូជំ ករោន្តិ តេ.

៦៥. ‘‘សុធាយ បិណ្ឌំ កត្វាន, អាវេឡំ សុមនាយហំ;

សីហាសនស្ស បុរតោ, អភិរោបេសហំ តទា.

៦៦. ‘‘សព្ពេ ជនា សមាគម្ម, បេក្ខន្តិ បុប្ផមុត្តមំ;

កេនិទំ បូជិតំ បុប្ផំ, ពុទ្ធសេដ្ឋស្ស តាទិនោ.

៦៧. ‘‘តេន ចិត្តប្បសាទេន, និម្មានំ ឧបបជ្ជហំ;

អនុភោមិ [អនុភោសិំ (សី.)] សកំ កម្មំ, បុព្ពេ សុកតមត្តនោ.

៦៨. ‘‘យំ យំ យោនុបបជ្ជាមិ, ទេវត្តំ អថ មានុសំ;

សព្ពេសានំ បិយោ ហោមិ, បុប្ផបូជាយិទំ ផលំ.

៦៩. ‘‘នាភិជានាមិ កាយេន, វាចាយ ឧទ ចេតសា;

សំយតានំ តបស្សីនំ, កតំ អក្កោសិតំ មយា.

៧០. ‘‘តេន សុចរិតេនាហំ, ចិត្តស្ស បណិធីហិ ច;

សព្ពេសំ បូជិតោ ហោមិ, អនក្កោសស្សិទំ ផលំ.

៧១. ‘‘ឥតោ ឯកាទសេ កប្បេ, សហស្សារោសិ ខត្តិយោ;

សត្តរតនសម្បន្នោ, ចក្កវត្តី មហព្ពលោ.

៧២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សុមនាវេឡិយោ ថេរោ ឥមា គាថាយោ អភាសិត្ថាតិ.

សុមនាវេឡិយត្ថេរស្សាបទានំ អដ្ឋមំ.