៣. គតសញ្ញកត្ថេរអបទានំ

១០. ‘‘អាកាសេវ បទំ នត្ថិ, អម្ពរេ អនិលញ្ជសេ;

សិទ្ធត្ថំ ជិនមទ្ទក្ខិំ, គច្ឆន្តំ តិទិវង្គណេ [តិទិវង្គណំ (ស្យា. ក.)].

១១. ‘‘អនិលេនេរិតំ ទិស្វា, សម្មាសម្ពុទ្ធចីវរំ;

វិត្តិ មមាហុ តាវទេ [វិត្តិ មេ បាហុណា តាវ (ស្យា.), វិត្តិ មេ តាវទេ ជាតា (សី.)], ទិស្វាន គមនំ មុនិំ [មុនេ (សី.)].

១២. ‘‘ចតុន្នវុតិតោ កប្បេ, យំ សញ្ញមលភិំ តទា;

ទុគ្គតិំ នាភិជានាមិ, ពុទ្ធសញ្ញាយិទំ ផលំ.

១៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា គតសញ្ញកោ ថេរោ ឥមា គាថាយោ អភាសិត្ថាតិ.

គតសញ្ញកត្ថេរស្សាបទានំ តតិយំ.