៤. សត្តបទុមិយត្ថេរអបទានំ

១៤. ‘‘នទីកូលេ វសាមហំ, នេសាទោ នាម ព្រាហ្មណោ;

សតបត្តេហិ បុប្ផេហិ, សម្មជ្ជិត្វាន អស្សមំ.

១៥. ‘‘សុវណ្ណវណ្ណំ សម្ពុទ្ធំ, សិទ្ធត្ថំ លោកនាយកំ;

ទិស្វា នភេន [វនេន (ស្យា. ក.)] គច្ឆន្តំ, ហាសោ មេ ឧទបជ្ជថ.

១៦. ‘‘បច្ចុគ្គន្ត្វាន សម្ពុទ្ធំ, លោកជេដ្ឋំ នរាសភំ;

អស្សមំ អតិនាមេត្វា, ជលជគ្គេហិ ឱកិរិំ.

១៧. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៨. ‘‘ឥតោ តេ សត្តមេ កប្បេ, ចតុរោ បាទបាវរា;

សត្តរតនសម្បន្នា, ចក្កវត្តី មហព្ពលា.

១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សត្តបទុមិយោ ថេរោ ឥមា គាថាយោ អភាសិត្ថាតិ.

សត្តបទុមិយត្ថេរស្សាបទានំ ចតុត្ថំ.