៥. គោសីសនិក្ខេបកត្ថេរអបទានំ

២១. ‘‘អារាមទ្វារា និក្ខម្ម, គោសីសំ សន្ថតំ មយា;

អនុភោមិ សកំ កម្មំ, បុព្ពកម្មស្សិទំ ផលំ.

២២. ‘‘អាជានិយា វាតជវា, សិន្ធវា សីឃវាហនា;

អនុភោមិ សព្ពមេតំ, គោសីសស្ស ឥទំ ផលំ.

២៣. ‘‘អហោ ការំ បរមការំ, សុខត្តេ សុកតំ មយា;

សង្ឃេ កតស្ស ការស្ស, ន អញ្ញំ កលមគ្ឃតិ.

២៤. ‘‘ចតុន្នវុតិតោ កប្បេ, យំ សីសំ សន្ថរិំ អហំ;

ទុគ្គតិំ នាភិជានាមិ, សន្ថរស្ស ឥទំ ផលំ.

២៥. ‘‘បញ្ចសត្តតិកប្បម្ហិ, សុប្បតិដ្ឋិតនាមកោ;

ឯកោ អាសិំ មហាតេជោ, ចក្កវត្តី មហព្ពលោ.

២៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា គោសីសនិក្ខេបកោ ថេរោ ឥមា គាថាយោ អភាសិត្ថាតិ.

គោសីសនិក្ខេបកត្ថេរស្សាបទានំ បញ្ចមំ.