៤. សទ្ទសញ្ញកត្ថេរអបទានំ

១៧. ‘‘អនុគ្គតម្ហិ អាទិច្ចេ, បនាទោ [បសាទោ (ស្យា. អដ្ឋ.)] វិបុលោ អហុ;

ពុទ្ធសេដ្ឋស្ស លោកម្ហិ, បាតុភាវោ មហេសិនោ.

១៨. ‘‘ឃោស [សទ្ទ (សី. ស្យា.)] មស្សោសហំ តត្ថ, ន ច បស្សាមិ តំ ជិនំ;

មរណញ្ច អនុប្បត្តោ, ពុទ្ធសញ្ញមនុស្សរិំ.

១៩. ‘‘ចតុន្នវុតិតោ កប្បេ, យំ សញ្ញមលភិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

២០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សទ្ទសញ្ញកោ ថេរោ ឥមា គាថាយោ អភាសិត្ថាតិ.

សទ្ទសញ្ញកត្ថេរស្សាបទានំ ចតុត្ថំ.