៣. ឆត្តទាយកត្ថេរអបទានំ

១១. ‘‘បុត្តោ មម បព្ពជិតោ, កាសាយវសនោ តទា;

សោ ច ពុទ្ធត្តំ សម្បត្តោ, និព្ពុតោ លោកបូជិតោ.

១២. ‘‘វិចិនន្តោ សកំ បុត្តំ, អគមំ បច្ឆតោ អហំ;

និព្ពុតស្ស មហន្តស្ស, ចិតកំ អគមាសហំ.

១៣. ‘‘បគ្គយ្ហ អញ្ជលិំ តត្ថ, វន្ទិត្វា ចិតកំ អហំ;

សេតច្ឆត្តញ្ច បគ្គយ្ហ, អារោបេសិំ អហំ តទា.

១៤. ‘‘ចតុន្នវុតិតោ កប្បេ, យំ ឆត្តមភិរោបយិំ;

ទុគ្គតិំ នាភិជានាមិ, ឆត្តទានស្សិទំ ផលំ.

១៥. ‘‘បញ្ចវីសេ ឥតោ កប្បេ, សត្ត អាសុំ ជនាធិបា;

មហារហសនាមា តេ, ចក្កវត្តី មហព្ពលា.

១៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឆត្តទាយកោ ថេរោ ឥមា គាថាយោ អភាសិត្ថាតិ.

ឆត្តទាយកត្ថេរស្សាបទានំ តតិយំ.