៩. ឯកញ្ជលិកត្ថេរអបទានំ

១៨០. ‘‘សុវណ្ណវណ្ណំ សម្ពុទ្ធំ, គច្ឆន្តំ អន្តរាបណេ;

វិបស្សិំ សត្ថវាហគ្គំ, នរវរំ វិនាយកំ.

១៨១. ‘‘អទន្តទមនំ តាទិំ, មហាវាទិំ មហាមតិំ;

ទិស្វា បសន្នោ សុមនោ, ឯកញ្ជលិមកាសហំ.

១៨២. ‘‘ឯកនវុតិតោ កប្បេ, យមញ្ជលិំ ករិំ [យំ អញ្ជលិមករិំ (ស្យា.), អញ្ជលិមករិំ (ក.)] តទា;

ទុគ្គតិំ នាភិជានាមិ, អញ្ជលិស្ស ឥទំ ផលំ.

១៨៣. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកញ្ជលិកោ ថេរោ ឥមា គាថាយោ អភាសិត្ថាតិ.

ឯកញ្ជលិកត្ថេរស្សាបទានំ នវមំ.