៨. ឧត្តិយត្ថេរអបទានំ

១៦៩. ‘‘ចន្ទភាគានទីតីរេ, សុសុមារោ អហំ តទា;

សគោចរប្បសុតោហំ [សភោជនបសុតាហំ (ស្យា. ក.)], នទីតិត្ថំ អគច្ឆហំ.

១៧០. ‘‘សិទ្ធត្ថោ តម្ហិ សមយេ, សយម្ភូ អគ្គបុគ្គលោ;

នទិំ តរិតុកាមោ សោ, នទីតិត្ថំ ឧបាគមិ.

១៧១. ‘‘ឧបាគតេ ច [ឧបាគតម្ហិ (ស្យា. ក.)] សម្ពុទ្ធេ, អហម្បិ តត្ថុបាគមិំ;

ឧបគន្ត្វាន សម្ពុទ្ធំ, ឥមំ វាចំ ឧទីរយិំ.

១៧២. ‘‘‘អភិរូហ មហាវីរ, តារេស្សាមិ អហំ តុវំ;

បេត្តិកំ វិសយំ មយ្ហំ, អនុកម្ប មហាមុនិ’.

១៧៣. ‘‘មម ឧគ្គជ្ជនំ សុត្វា, អភិរូហិ មហាមុនិ;

ហដ្ឋោ ហដ្ឋេន ចិត្តេន, តារេសិំ លោកនាយកំ.

១៧៤. ‘‘នទិយា បារិមេ តីរេ, សិទ្ធត្ថោ លោកនាយកោ;

អស្សាសេសិ មមំ តត្ថ, អមតំ បាបុណិស្សសិ.

១៧៥. ‘‘តម្ហា កាយា ចវិត្វាន, ទេវលោកំ អាគច្ឆហំ;

ទិព្ពសុខំ អនុភវិំ, អច្ឆរាហិ បុរក្ខតោ.

១៧៦. ‘‘សត្តក្ខត្តុញ្ច ទេវិន្ទោ, ទេវរជ្ជមកាសហំ;

តីណិក្ខត្តុំ ចក្កវត្តី, មហិយា ឥស្សរោ អហុំ.

១៧៧. ‘‘វិវេកមនុយុត្តោហំ, និបកោ ច សុសំវុតោ;

ធារេមិ អន្តិមំ ទេហំ, សម្មាសម្ពុទ្ធសាសនេ.

១៧៨. ‘‘ចតុន្នវុតិតោ កប្បេ, តារេសិំ យំ នរាសភំ;

ទុគ្គតិំ នាភិជានាមិ, តរណាយ ឥទំ ផលំ.

១៧៩. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧត្តិយោ [ឧត្តិរិយោ (សី.)] ថេរោ ឥមា គាថាយោ អភាសិត្ថាតិ.

ឧត្តិយត្ថេរស្សាបទានំ អដ្ឋមំ.