៧. បុលិនបូជកត្ថេរអបទានំ

១៦៥. ‘‘វិបស្សិស្ស ភគវតោ, ពោធិយា បាទបុត្តមេ;

បុរាណបុលិនំ ហិត្វា [ឆឌ្ឌេត្វា (សី. ស្យា.)], សុទ្ធបុលិនមាកិរិំ.

១៦៦. ‘‘ឯកនវុតិតោ កប្បេ, យំ បុលិនមទាសហំ;

ទុគ្គតិំ នាភិជានាមិ, បុលិនទានស្សិទំ ផលំ.

១៦៧. ‘‘តិំសតិមេ [តិបញ្ញាសេ (សី. ស្យា.)] ឥតោ កប្បេ, រាជា អាសិំ ជនាធិភូ;

មហាបុលិននាមេន, ចក្កវត្តី មហព្ពលោ.

១៦៨. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា បុលិនបូជកោ ថេរោ ឥមា គាថាយោ អភាសិត្ថាតិ.

បុលិនបូជកត្ថេរស្សាបទានំ សត្តមំ.