៦. ធូបទាយកត្ថេរអបទានំ

១៦១. ‘‘សិទ្ធត្ថស្ស ភគវតោ, លោកជេដ្ឋស្ស តាទិនោ;

កុដិធូបំ មយា ទិន្នំ, វិប្បសន្នេន ចេតសា.

១៦២. យំ យំ យោនុបបជ្ជាមិ, ទេវត្តំ អថ មានុសំ;

សព្ពេសម្បិ បិយោ ហោមិ, ធូបទានស្សិទំ ផលំ.

១៦៣. ‘‘ចតុន្នវុតិតោ កប្បេ, យំ ធូបមទទិំ តទា [យំ ធូបនមទាសហំ (ក.)];

ទុគ្គតិំ នាភិជានាមិ, ធូបទានស្សិទំ ផលំ.

១៦៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ធូបទាយកោ ថេរោ ឥមា គាថាយោ អភាសិត្ថាតិ.

ធូបទាយកត្ថេរស្សាបទានំ ឆដ្ឋំ.