៤. បញ្ចសីលសមាទានិយត្ថេរអបទានំ

១៣៤. ‘‘នគរេ ចន្ទវតិយា, ភតកោ អាសហំ តទា;

បរកម្មាយនេ យុត្តោ, បព្ពជ្ជំ ន លភាមហំ.

១៣៥. ‘‘មហន្ធការបិហិតា, តិវិធគ្គីហិ ឌយ្ហរេ;

កេន នុ ខោ ឧបាយេន, វិសំយុត្តោ ភវេ អហំ.

១៣៦. ‘‘ទេយ្យធម្មោ ច មេ នត្ថិ, វរាកោ ភតកោ អហំ;

យំនូនាហំ បញ្ចសីលំ, រក្ខេយ្យំ បរិបូរយំ.

១៣៧. ‘‘អនោមទស្សិស្ស មុនិនោ, និសភោ នាម សាវកោ;

តមហំ ឧបសង្កម្ម, បញ្ចសិក្ខាបទគ្គហិំ.

១៣៨. ‘‘វស្សសតសហស្សានិ, អាយុ វិជ្ជតិ តាវទេ;

តាវតា បញ្ចសីលានិ, បរិបុណ្ណានិ គោបយិំ.

១៣៩. ‘‘មច្ចុកាលេ ច សម្បត្តេ, ទេវា អស្សាសយន្តិ មំ;

‘រថោ សហស្សយុត្តោ តេ, មារិសាយំ [មារិសស្ស (ក.)] ឧបដ្ឋិតោ’.

១៤០. ‘‘វត្តន្តេ ចរិមេ ចិត្តេ, មម សីលំ អនុស្សរិំ;

តេន កម្មេន សុកតេន, តាវតិំសំ អគច្ឆហំ.

១៤១. ‘‘តិំសក្ខត្តុញ្ច ទេវិន្ទោ, ទេវរជ្ជមការយិំ;

ទិព្ពសុខំ [ទិព្ពំ សុខំ (សី.)] អនុភវិំ, អច្ឆរាហិ បុរក្ខតោ.

១៤២. ‘‘បញ្ចសត្តតិក្ខត្តុញ្ច, ចក្កវត្តី អហោសហំ;

បទេសរជ្ជំ វិបុលំ, គណនាតោ អសង្ខិយំ.

១៤៣. ‘‘ទេវលោកា ចវិត្វាន, សុក្កមូលេន ចោទិតោ;

បុរេ វេសាលិយំ ជាតោ, មហាសាលេ សុអឌ្ឍកេ.

១៤៤. ‘‘វស្សូបនាយិកេ កាលេ, ទិប្បន្តេ [ទិព្ពន្តិ (ក.)] ជិនសាសនេ;

មាតា ច មេ បិតា ចេវ, បញ្ចសិក្ខាបទគ្គហុំ.

១៤៥. ‘‘សហ សុត្វានហំ សីលំ, មម សីលំ អនុស្សរិំ;

ឯកាសនេ និសីទិត្វា, អរហត្តមបាបុណិំ.

១៤៦. ‘‘ជាតិយា បញ្ចវស្សេន, អរហត្តមបាបុណិំ;

ឧបសម្បាទយិ ពុទ្ធោ, គុណមញ្ញាយ ចក្ខុមា.

១៤៧. ‘‘បរិបុណ្ណានិ គោបេត្វា, បញ្ចសិក្ខាបទានហំ;

អបរិមេយ្យេ ឥតោ កប្បេ, វិនិបាតំ ន គច្ឆហំ.

១៤៨. ‘‘ស្វាហំ យសមនុភវិំ, តេសំ សីលាន វាហសា;

កប្បកោដិម្បិ កិត្តេន្តោ, កិត្តយេ ឯកទេសកំ.

១៤៩. ‘‘បញ្ចសីលានិ គោបេត្វា, តយោ ហេតូ លភាមហំ;

ទីឃាយុកោ មហាភោគោ, តិក្ខបញ្ញោ ភវាមហំ.

១៥០. ‘‘សំកិត្តេន្តោ ច [បកិត្តេន្តោវ (សី.), បកិត្តេន្តេ ច (ស្យា.)] សព្ពេសំ, អភិមត្តញ្ច បោរិសំ;

ភវាភវេ សំសរិត្វា, ឯតេ ឋានេ លភាមហំ.

១៥១. ‘‘អបរិមេយ្យសីលេសុ, វត្តន្តា ជិនសាវកា;

ភវេសុ យទិ រជ្ជេយ្យុំ, វិបាកោ កីទិសោ ភវេ.

១៥២. ‘‘សុចិណ្ណំ មេ បញ្ចសីលំ, ភតកេន តបស្សិនា [វិបស្សិនា (សី.)];

តេន សីលេនហំ អជ្ជ, មោចយិំ សព្ពពន្ធនា.

១៥៣. ‘‘អបរិមេយ្យេ ឥតោ កប្បេ, បញ្ចសីលានិ គោបយិំ;

ទុគ្គតិំ នាភិជានាមិ, បញ្ចសីលានិទំ ផលំ.

១៥៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា បញ្ចសីលសមាទានិយោ ថេរោ ឥមា គាថាយោ អភាសិត្ថាតិ.

បញ្ចសីលសមាទានិយត្ថេរស្សាបទានំ ចតុត្ថំ.