៣. តិសរណគមនិយត្ថេរអបទានំ

១០៦. ‘‘នគរេ ចន្ទវតិយា [ពន្ធុមតិយា (អដ្ឋ.)], មាតុឧបដ្ឋាកោ [មាតុបដ្ឋាយកោ (សី.), មាតុបដ្ឋានកោ (ស្យា.)] អហុំ;

អន្ធា មាតា បិតា មយ្ហំ, តេ បោសេមិ អហំ តទា.

១០៧. ‘‘រហោគតោ និសីទិត្វា, ឯវំ ចិន្តេសហំ តទា;

បោសេន្តោ មាតាបិតរោ, បព្ពជ្ជំ ន លភាមហំ.

១០៨. ‘‘មហន្ធការបិហិតា [តមន្ធការបិហិតា (ស្យា.)], តិវិធគ្គីហិ ឌយ្ហរេ;

ឯតាទិសេ ភវេ [ភយេ (សី.)] ជាតេ, នត្ថិ កោចិ វិនាយកោ.

១០៩. ‘‘ពុទ្ធោ លោកេ សមុប្បន្នោ, ទិប្បតិ [ទិព្ពតិ (ក.)] [ជិនសាសនំ (សី.)] ទានិ សាសនំ;

សក្កា ឧទ្ធរិតុំ អត្តា, បុញ្ញកាមេន ជន្តុនា.

១១០. ‘‘ឧគ្គយ្ហ តីណិ សរណេ, បរិបុណ្ណានិ គោបយិំ;

តេន កម្មេន សុកតេន, បដិមោក្ខាមិ ទុគ្គតិំ.

១១១. ‘‘និសភោ នាម សមណោ, ពុទ្ធស្ស អគ្គសាវកោ;

តមហំ ឧបគន្ត្វាន, សរណគមនំ គហិំ.

១១២. ‘‘វស្សសតសហស្សានិ, អាយុ វិជ្ជតិ តាវទេ;

តាវតា សរណគមនំ, បរិបុណ្ណំ អគោបយិំ.

១១៣. ‘‘ចរិមេ វត្តមានម្ហិ, សរណំ តំ អនុស្សរិំ;

តេន កម្មេន សុកតេន, តាវតិំសំ អគច្ឆហំ.

១១៤. ‘‘ទេវលោកគតោ សន្តោ, បុញ្ញកម្មសមាហិតោ;

យំ ទេសំ [យំ យំ ទេសំ (ស្យា.)] ឧបបជ្ជាមិ [ឧបគច្ឆាមិ (សី.)], អដ្ឋ ហេតូ លភាមហំ.

១១៥. ‘‘ទិសាសុ បូជិតោ ហោមិ, តិក្ខបញ្ញោ ភវាមហំ;

សព្ពេ ទេវានុវត្តន្តិ, អមិតភោគំ លភាមហំ.

១១៦. ‘‘សុវណ្ណវណ្ណោ សព្ពត្ថ, បដិកន្តោ ភវាមហំ;

មិត្តានំ អចលោ ហោមិ, យសោ អព្ភុគ្គតោ មមំ.

១១៧. ‘‘អសីតិក្ខត្តុ ទេវិន្ទោ, ទេវរជ្ជមការយិំ;

ទិព្ពសុខំ អនុភវិំ, អច្ឆរាហិ បុរក្ខតោ.

១១៨. ‘‘បញ្ចសត្តតិក្ខត្តុញ្ច, ចក្កវត្តី អហោសហំ;

បទេសរជ្ជំ វិបុលំ, គណនាតោ អសង្ខិយំ.

១១៩. ‘‘បច្ឆិមេ ភវេ សម្បត្តេ, បុញ្ញកម្មសមាហិតោ;

បុរេ សាវត្ថិយំ ជាតោ, មហាសាលេ សុអឌ្ឍកេ.

១២០. ‘‘នគរា និក្ខមិត្វាន, ទារកេហិ បុរក្ខតោ;

ហសខិឌ្ឌសមង្គីហំ [សាហំ ខិឌ្ឌសមង្គី (ស្យា.)], សង្ឃារាមំ ឧបាគមិំ.

១២១. ‘‘តត្ថទ្ទសាសិំ [តត្ថទ្ទសាហំ (ក.)] សមណំ, វិប្បមុត្តំ និរូបធិំ;

សោ មេ ធម្មមទេសេសិ, សរណញ្ច អទាសិ មេ.

១២២. ‘‘សោហំ សុត្វាន សរណំ, សរណំ មេ អនុស្សរិំ;

ឯកាសនេ និសីទិត្វា, អរហត្តមបាបុណិំ.

១២៣. ‘‘ជាតិយា សត្តមេ វស្សេ, អរហត្តមបាបុណិំ;

ឧបសម្បាទយិ ពុទ្ធោ, គុណមញ្ញាយ ចក្ខុមា.

១២៤. ‘‘អបរិមេយ្យេ ឥតោ កប្បេ, សរណានិ អគច្ឆហំ;

តតោ មេ សុកតំ កម្មំ, ផលំ ទស្សេសិ មេ ឥធ.

១២៥. ‘‘សុគោបិតំ មេ សរណំ, មានសំ សុប្បណីហិតំ;

អនុភោត្វា យសំ សព្ពំ, បត្តោម្ហិ អចលំ បទំ.

១២៦. ‘‘យេសំ សោតាវធានត្ថិ, សុណោថ មម ភាសតោ;

អហំ [អត្ថំ (ស្យា.)] វោ កថយិស្សាមិ, សាមំ ទិដ្ឋំ បទំ មម.

១២៧. ‘‘‘ពុទ្ធោ លោកេ សមុប្បន្នោ, វត្តតេ ជិនសាសនំ;

អមតា វាទិតា ភេរី, សោកសល្លវិនោទនា.

១២៨. ‘‘‘យថាសកេន ថាមេន, បុញ្ញក្ខេត្តេ អនុត្តរេ;

អធិការំ ករេយ្យាថ, បស្សយិស្សថ និព្ពុតិំ.

១២៩. ‘‘‘បគ្គយ្ហ តីណិ សរណេ, បញ្ចសីលានិ គោបិយ;

ពុទ្ធេ ចិត្តំ បសាទេត្វា, ទុក្ខស្សន្តំ ករិស្សថ.

១៣០. ‘‘‘សម្មា ធម្មំ ភាវេត្វាន [មមោបមំ ករិត្វាន (សី. ស្យា.)], សីលានិ បរិគោបិយ;

អចិរំ អរហត្តំ វោ, សព្ពេបិ បាបុណិស្សថ.

១៣១. ‘‘‘តេវិជ្ជោ ឥទ្ធិបត្តោម្ហិ, ចេតោបរិយកោវិទោ;

សាវកោ តេ មហាវីរ, សរណោ [ចរណេ (សី. ស្យា.)] វន្ទតិ សត្ថុនោ’.

១៣២. ‘‘អបរិមេយ្យេ ឥតោ កប្បេ, សរណំ ពុទ្ធស្ស គច្ឆហំ;

ទុគ្គតិំ នាភិជានាមិ, សរណំ គមនេ ផលំ.

១៣៣. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា តិសរណគមនិយោ ថេរោ ឥមា គាថាយោ អភាសិត្ថាតិ.

តិសរណគមនិយត្ថេរស្សាបទានំ តតិយំ.