២. ឧបវានត្ថេរអបទានំ

៥២. ‘‘បទុមុត្តរោ នាម ជិនោ, សព្ពធម្មាន បារគូ;

ជលិត្វា អគ្គិក្ខន្ធោវ, សម្ពុទ្ធោ បរិនិព្ពុតោ.

៥៣. ‘‘មហាជនា សមាគម្ម, បូជយិត្វា តថាគតំ;

ចិតំ កត្វាន សុកតំ, សរីរំ អភិរោបយុំ.

៥៤. ‘‘សរីរកិច្ចំ កត្វាន, ធាតុំ តត្ថ សមានយុំ;

សទេវមានុសា សព្ពេ, ពុទ្ធថូបំ អកំសុ តេ.

៥៥. ‘‘បឋមា កញ្ចនមយា, ទុតិយាសិ មណីមយា;

តតិយា រូបិយមយា, ចតុត្ថី ផលិកាមយា.

៥៦. ‘‘តថា [តត្ថ (ស្យា. ក.)] បញ្ចមិយា ភូមិ [នេមិ (សី.)], លោហិតង្គមយា អហុ;

ឆដ្ឋា មសារគល្លស្ស, សព្ពរតនមយូបរិ.

៥៧. ‘‘ជង្ឃា មណិមយា អាសិ, វេទិកា រតនមយា;

សព្ពសោណ្ណមយោ ថូបោ, ឧទ្ធំ យោជនមុគ្គតោ.

៥៨. ‘‘ទេវា តត្ថ សមាគន្ត្វា, ឯកតោ មន្តយុំ តទា;

មយម្បិ ថូបំ កស្សាម, លោកនាថស្ស តាទិនោ.

៥៩. ‘‘ធាតុ អាវេណិកា នត្ថិ, សរីរំ ឯកបិណ្ឌិតំ;

ឥមម្ហិ ពុទ្ធថូបម្ហិ, កស្សាម កញ្ចុកំ មយំ.

៦០. ‘‘ទេវា សត្តហិ រត្នេហិ [សត្តរតនេហិ (សី.)], អញ្ញំ វឌ្ឍេសុ យោជនំ;

ថូបោ ទ្វិយោជនុព្ពេធោ, តិមិរំ ព្យបហន្តិ សោ.

៦១. ‘‘នាគា តត្ថ សមាគន្ត្វា, ឯកតោ មន្តយុំ តទា;

មនុស្សា ចេវ ទេវា ច, ពុទ្ធថូបំ អកំសុ តេ.

៦២. ‘‘មា នោ បមត្តា អស្សុម្ហ [អស្សុម្ហា (សី. ស្យា.), អាសិម្ហា (?)], អប្បមត្តា សទេវកា;

មយម្បិ ថូបំ កស្សាម, លោកនាថស្ស តាទិនោ.

៦៣. ‘‘ឥន្ទនីលំ មហានីលំ, អថោ ជោតិរសំ មណិំ;

ឯកតោ សន្និបាតេត្វា, ពុទ្ធថូបំ អឆាទយុំ.

៦៤. ‘‘សព្ពំ មណិមយំ អាសិ, តាវតា ពុទ្ធចេតិយំ;

តិយោជនសមុព្ពិទ្ធំ [តីណិ យោជនមុព្ពិទ្ធំ (សី. ក.)], អាលោកករណំ តទា.

៦៥. ‘‘គរុឡា ច សមាគន្ត្វា, ឯកតោ មន្តយុំ តទា;

មនុស្សា ទេវា នាគា ច, ពុទ្ធថូបំ អកំសុ តេ.

៦៦. ‘‘‘មា នោ បមត្តា អស្សុម្ហ, អប្បមត្តា សទេវកា;

មយម្បិ ថូបំ កស្សាម, លោកនាថស្ស តាទិនោ’.

៦៧. ‘‘សព្ពំ មណិមយំ ថូបំ, អករុំ តេ ច កញ្ចុកំ [សព្ពមណិមយំ ថូបេ, អករុត្តរកញ្ចុកំ (សី.)];

យោជនំ តេបិ វឌ្ឍេសុំ, អាយតំ ពុទ្ធចេតិយំ.

៦៨. ‘‘ចតុយោជនមុព្ពិទ្ធោ, ពុទ្ធថូបោ វិរោចតិ;

ឱភាសេតិ ទិសា សព្ពា, សតរំសីវ ឧគ្គតោ.

៦៩. ‘‘កុម្ភណ្ឌា ច សមាគន្ត្វា, ឯកតោ មន្តយុំ តទា;

មនុស្សា ចេវ ទេវា ច, នាគា ច គរុឡា តថា.

បច្ចេកំ ពុទ្ធសេដ្ឋស្ស, អកំសុ ថូបមុត្តមំ.

៧០. ‘‘‘មា នោ បមត្តា អស្សុម្ហ, អប្បមត្តា សទេវកា;

មយម្បិ ថូបំ កស្សាម, លោកនាថស្ស តាទិនោ;

រតនេហិ ឆាទេស្សាម, អាយតំ ពុទ្ធចេតិយំ’.

៧១. ‘‘យោជនំ តេបិ វឌ្ឍេសុំ, អាយតំ ពុទ្ធចេតិយំ;

បញ្ចយោជនមុព្ពិទ្ធោ, ថូបោ ឱភាសតេ តទា.

៧២. ‘‘យក្ខា តត្ថ សមាគន្ត្វា, ឯកតោ មន្តយុំ តទា;

មនុស្សា ទេវា នាគា ច, គរុឡា កុម្ភអណ្ឌកា.

៧៣. ‘‘បច្ចេកំ ពុទ្ធសេដ្ឋស្ស, អកំសុ ថូបមុត្តមំ;

‘មា នោ បមត្តា អស្សុម្ហ, អប្បមត្តា សទេវកា.

៧៤. ‘‘‘មយម្បិ ថូបំ កស្សាម, លោកនាថស្ស តាទិនោ;

ផលិកាហិ ឆាទេស្សាម, អាយតំ ពុទ្ធចេតិយំ’.

៧៥. ‘‘យោជនំ តេបិ វឌ្ឍេសុំ, អាយតំ ពុទ្ធចេតិយំ;

ឆ យោជនានិ ឧព្ពិទ្ធោ, ថូបោ ឱភាសតេ តទា.

៧៦. ‘‘គន្ធព្ពា ច សមាគន្ត្វា, ឯកតោ មន្តយុំ តទា;

‘មនុជា ទេវតា នាគា, គរុឡា កុម្ភយក្ខកា.

៧៧. ‘‘‘សព្ពេកំសុ ពុទ្ធថូបំ, មយមេត្ថ អការកា;

មយម្បិ ថូបំ កស្សាម, លោកនាថស្ស តាទិនោ’.

៧៨. ‘‘វេទិយោ សត្ត កត្វាន, ឆត្តមារោបយិំសុ តេ;

សព្ពសោណ្ណមយំ ថូបំ, គន្ធព្ពា ការយុំ តទា.

៧៩. ‘‘សត្តយោជនមុព្ពិទ្ធោ, ថូបោ ឱភាសតេ តទា;

រត្តិន្ទិវា ន ញាយន្តិ, អាលោកោ ហោតិ [អាលោកា ហោន្តិ (ស្យា. ក.)] សព្ពទា.

៨០. ‘‘អភិភោន្តិ ន តស្សាភា, ចន្ទសូរា សតារកា;

សមន្តា យោជនសតេ, បទីបោបិ ន បជ្ជលិ.

៨១. ‘‘តេន កាលេន យេ កេចិ, ថូបំ បូជេន្តិ មានុសា;

ន តេ ថូបមារុហន្តិ, អម្ពរេ ឧក្ខិបន្តិ តេ.

៨២. ‘‘ទេវេហិ ឋបិតោ យក្ខោ, អភិសម្មតនាមកោ;

ធជំ វា បុប្ផទាមំ វា, អភិរោបេតិ ឧត្តរិ.

៨៣. ‘‘ន តេ បស្សន្តិ តំ យក្ខំ, ទាមំ បស្សន្តិ គច្ឆតោ;

ឯវំ បស្សិត្វា គច្ឆន្តា, សព្ពេ គច្ឆន្តិ សុគ្គតិំ.

៨៤. ‘‘វិរុទ្ធា [វិសទ្ធា (សី.)] យេ បាវចនេ, បសន្នា យេ ច សាសនេ;

បាដិហេរំ ទដ្ឋុកាមា, ថូបំ បូជេន្តិ មានុសា.

៨៥. ‘‘នគរេ ហំសវតិយា, អហោសិំ ភតកោ [វរកោ (ស្យា. ក.)] តទា;

អាមោទិតំ ជនំ ទិស្វា, ឯវំ ចិន្តេសហំ តទា.

៨៦. ‘‘‘ឧឡារោ ភគវា ហេសោ, យស្ស ធាតុធរេទិសំ;

ឥមា ច ជនតា តុដ្ឋា, ការំ កុព្ពំ ន តប្បរេ [កុព្ពន្តនប្បកំ (សី.)].

៨៧. ‘‘‘អហម្បិ ការំ កស្សាមិ, លោកនាថស្ស តាទិនោ;

តស្ស ធម្មេសុ ទាយាទោ, ភវិស្សាមិ អនាគតេ’.

៨៨. ‘‘សុធោតំ រជកេនាហំ, ឧត្តរេយ្យបដំ មម;

វេឡគ្គេ អាលគេត្វាន, ធជំ ឧក្ខិបិមម្ពរេ.

៨៩. ‘‘អភិសម្មតកោ គយ្ហ, អម្ពរេហាសិ មេ ធជំ;

វាតេរិតំ ធជំ ទិស្វា, ភិយ្យោ ហាសំ ជនេសហំ.

៩០. ‘‘តត្ថ ចិត្តំ បសាទេត្វា, សមណំ ឧបសង្កមិំ;

តំ ភិក្ខុំ អភិវាទេត្វា, វិបាកំ បុច្ឆហំ ធជេ.

៩១. ‘‘សោ មេ កថេសិ អានន្ទ, បីតិសញ្ជននំ មម;

‘តស្ស ធជស្ស វិបាកំ, អនុភោស្សសិ សព្ពទា.

៩២. ‘‘‘ហត្ថី អស្សា រថា បត្តី, សេនា ច ចតុរង្គិនី;

បរិវារេស្សន្តិ តំ និច្ចំ, ធជទានស្សិទំ ផលំ.

៩៣. ‘‘‘សដ្ឋិតូរិយសហស្សានិ, ភេរិយោ សមលង្កតា;

បរិវារេស្សន្តិ តំ និច្ចំ, ធជទានស្សិទំ ផលំ.

៩៤. ‘‘‘ឆឡាសីតិសហស្សានិ, នារិយោ សមលង្កតា;

វិចិត្តវត្ថាភរណា, អាមុត្តមណិកុណ្ឌលា.

៩៥. ‘‘‘អឡារបម្ហា ហសុលា, សុសញ្ញា តនុមជ្ឈិមា;

បរិវារេស្សន្តិ តំ និច្ចំ, ធជទានស្សិទំ ផលំ.

៩៦. ‘‘‘តិំសកប្បសហស្សានិ, ទេវលោកេ រមិស្សសិ;

អសីតិក្ខត្តុំ ទេវិន្ទោ, ទេវរជ្ជំ ករិស្សសិ.

៩៧. ‘‘‘សហស្សក្ខត្តុំ រាជា ច, ចក្កវត្តី ភវិស្សសិ;

បទេសរជ្ជំ វិបុលំ, គណនាតោ អសង្ខិយំ.

៩៨. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៩៩. ‘‘‘ទេវលោកា ចវិត្វាន, សុក្កមូលេន ចោទិតោ;

បុញ្ញកម្មេន សំយុត្តោ, ព្រហ្មពន្ធុ ភវិស្សសិ.

១០០. ‘‘‘អសីតិកោដិំ ឆឌ្ឌេត្វា, ទាសេ កម្មករេ ពហូ;

គោតមស្ស ភគវតោ, សាសនេ បព្ពជិស្សសិ.

១០១. ‘‘‘អារាធយិត្វា សម្ពុទ្ធំ, គោតមំ សក្យបុង្គវំ;

ឧបវានោតិ នាមេន, ហេស្សសិ សត្ថុ សាវកោ’.

១០២. ‘‘សតសហស្សេ កតំ កម្មំ, ផលំ ទស្សេសិ មេ ឥធ;

សុមុត្តោ សរវេគោវ កិលេសេ ឈាបយី មម.

១០៣. ‘‘ចក្កវត្តិស្ស សន្តស្ស, ចតុទីបិស្សរស្ស មេ;

តិយោជនានិ សមន្តា, ឧស្សីសន្តិ ធជា សទា.

១០៤. ‘‘សតសហស្សិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ធជទានស្សិទំ ផលំ.

១០៥. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧបវានោ ថេរោ ឥមា គាថាយោ អភាសិត្ថាតិ.

ឧបវានត្ថេរស្សាបទានំ ទុតិយំ.