៣. បច្ចុគ្គមនិយត្ថេរអបទានំ

១១. ‘‘សីហំ យថា វនចរំ, និសភាជានិយំ យថា;

កកុធំ វិលសន្តំវ, អាគច្ឆន្តំ នរាសភំ.

១២. ‘‘សិទ្ធត្ថំ លោកបជ្ជោតំ, សព្ពលោកតិកិច្ឆកំ;

អកាសិំ បច្ចុគ្គមនំ, វិប្បសន្នេន ចេតសា.

១៣. ‘‘ចតុន្នវុតិតោ កប្បេ, បច្ចុគ្គច្ឆិំ នរាសភំ;

ទុគ្គតិំ នាភិជានាមិ, បច្ចុគ្គមនេ ឥទំ ផលំ.

១៤. ‘‘សត្តតិំសេ [សត្តវីសេ (សី. ស្យា.)] ឥតោ កប្បេ, ឯកោ អាសិំ ជនាធិបោ;

សបរិវារោតិ នាមេន, ចក្កវត្តី មហព្ពលោ.

១៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បច្ចុគ្គមនិយោ ថេរោ ឥមា គាថាយោ អភាសិត្ថាតិ.

បច្ចុគ្គមនិយត្ថេរស្សាបទានំ តតិយំ.