២៩. បណ្ណទាយកវគ្គោ

១. បណ្ណទាយកត្ថេរអបទានំ

១. ‘‘បណ្ណសាលេ និសិន្នោម្ហិ, បណ្ណភោជនភោជនោ;

ឧបវិដ្ឋញ្ច មំ សន្តំ, ឧបាគច្ឆិ មហាឥសិ [មហាមុនិ (សី.)].

២. ‘‘សិទ្ធត្ថោ លោកបជ្ជោតោ, សព្ពលោកតិកិច្ឆកោ;

តស្ស បណ្ណំ មយា ទិន្នំ, និសិន្នំ [និសិន្នស្ស (ស្យា. អដ្ឋ.)] បណ្ណសន្ថរេ.

៣. ‘‘ចតុន្នវុតិតោ កប្បេ, យំ បណ្ណមទទិំ តទា;

ទុគ្គតិំ នាភិជានាមិ, បណ្ណទានស្សិទំ ផលំ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា បណ្ណទាយកោ ថេរោ ឥមា គាថាយោ អភាសិត្ថាតិ.

បណ្ណទាយកត្ថេរស្សាបទានំ បឋមំ.

២. ផលទាយកត្ថេរអបទានំ

៥. ‘‘សិនេរុសមសន្តោសោ, ធរណីសម [ធរណីធរ (សី. ស្យា.)] សាទិសោ;

វុដ្ឋហិត្វា សមាធិម្ហា, ភិក្ខាយ មមុបដ្ឋិតោ.

៦. ‘‘ហរីតកំ [ហរីតកិំ (ស្យា.)] អាមលកំ, អម្ពជម្ពុវិភីតកំ;

កោលំ ភល្លាតកំ ពិល្លំ, ផារុសកផលានិ ច.

៧. ‘‘សិទ្ធត្ថស្ស មហេសិស្ស, សព្ពលោកានុកម្បិនោ;

តញ្ច សព្ពំ មយា ទិន្នំ, វិប្បសន្នេន ចេតសា.

៨. ‘‘ចតុន្នវុតិតោ កប្បេ, យំ ផលំ អទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

៩. ‘‘សត្តបញ្ញាសិតោ កប្បេ, ឯកជ្ឈោ នាម ខត្តិយោ;

សត្តរតនសម្បន្នោ, ចក្កវត្តី មហព្ពលោ.

១០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ផលទាយកោ ថេរោ ឥមា គាថាយោ អភាសិត្ថាតិ.

ផលទាយកត្ថេរស្សាបទានំ ទុតិយំ.

៣. បច្ចុគ្គមនិយត្ថេរអបទានំ

១១. ‘‘សីហំ យថា វនចរំ, និសភាជានិយំ យថា;

កកុធំ វិលសន្តំវ, អាគច្ឆន្តំ នរាសភំ.

១២. ‘‘សិទ្ធត្ថំ លោកបជ្ជោតំ, សព្ពលោកតិកិច្ឆកំ;

អកាសិំ បច្ចុគ្គមនំ, វិប្បសន្នេន ចេតសា.

១៣. ‘‘ចតុន្នវុតិតោ កប្បេ, បច្ចុគ្គច្ឆិំ នរាសភំ;

ទុគ្គតិំ នាភិជានាមិ, បច្ចុគ្គមនេ ឥទំ ផលំ.

១៤. ‘‘សត្តតិំសេ [សត្តវីសេ (សី. ស្យា.)] ឥតោ កប្បេ, ឯកោ អាសិំ ជនាធិបោ;

សបរិវារោតិ នាមេន, ចក្កវត្តី មហព្ពលោ.

១៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បច្ចុគ្គមនិយោ ថេរោ ឥមា គាថាយោ អភាសិត្ថាតិ.

បច្ចុគ្គមនិយត្ថេរស្សាបទានំ តតិយំ.

៤. ឯកបុប្ផិយត្ថេរអបទានំ

១៦. ‘‘ទក្ខិណម្ហិ ទុវារម្ហិ, បិសាចោ អាសហំ តទា;

អទ្ទសំ វិរជំ ពុទ្ធំ, បីតរំសិំវ ភាណុមំ.

១៧. ‘‘វិបស្សិស្ស នរគ្គស្ស, សព្ពលោកហិតេសិនោ;

ឯកបុប្ផំ មយា ទិន្នំ, ទ្វិបទិន្ទស្ស តាទិនោ.

១៨. ‘‘ឯកនវុតិតោ កប្បេ, យំ បុប្ផមទទិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកបុប្ផិយោ ថេរោ ឥមា គាថាយោ អភាសិត្ថាតិ.

ឯកបុប្ផិយត្ថេរស្សាបទានំ ចតុត្ថំ.

៥. មឃវបុប្ផិយត្ថេរអបទានំ

២០. ‘‘នម្មទានទិយា តីរេ, សយម្ភូ អបរាជិតោ;

សមាធិំ សោ សមាបន្នោ, វិប្បសន្នោ អនាវិលោ.

២១. ‘‘ទិស្វា បសន្នសុមនោ, សម្ពុទ្ធំ អបរាជិតំ;

តាហំ មឃវបុប្ផេន, សយម្ភុំ បូជយិំ តទា.

២២. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មឃវបុប្ផិយោ ថេរោ ឥមា គាថាយោ អភាសិត្ថាតិ.

មឃវបុប្ផិយត្ថេរស្សាបទានំ បញ្ចមំ.

៦. ឧបដ្ឋាកទាយកត្ថេរអបទានំ

២៤. ‘‘រថិយំ បដិបជ្ជន្តំ, អាហុតីនំ បដិគ្គហំ;

ទ្វិបទិន្ទំ មហានាគំ, លោកជេដ្ឋំ នរាសភំ.

២៥. ‘‘បក្កោសាបិយ តស្សាហំ, សព្ពលោកហិតេសិនោ;

ឧបដ្ឋាកោ មយា ទិន្នោ, សិទ្ធត្ថស្ស មហេសិនោ.

២៦. ‘‘បដិគ្គហេត្វា [បដិគ្គហេសិ (ក.)] សម្ពុទ្ធោ, និយ្យាទេសិ មហាមុនិ [មហាឥសិ (ក.)];

ឧដ្ឋាយ អាសនា តម្ហា, បក្កាមិ បាចិនាមុខោ.

២៧. ‘‘ចតុន្នវុតិតោ កប្បេ, ឧបដ្ឋាកមទំ តទា;

ទុគ្គតិំ នាភិជានាមិ, ឧបដ្ឋានស្សិទំ ផលំ.

២៨. ‘‘សត្តបញ្ញាសិតោ កប្បេ, ពលសេនសនាមកោ;

សត្តរតនសម្បន្នោ, ចក្កវត្តី មហព្ពលោ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧបដ្ឋាកទាយកោ ថេរោ ឥមា គាថាយោ អភាសិត្ថាតិ.

ឧបដ្ឋាកទាយកត្ថេរស្សាបទានំ ឆដ្ឋំ.

៧. អបទានិយត្ថេរអបទានំ

៣០. ‘‘អបទានំ សុគតានំ, កិត្តយិំហំ មហេសិនំ;

បាទេ ច សិរសា វន្ទិំ, បសន្នោ សេហិ បាណិភិ.

៣១. ‘‘ទ្វេនវុតេ ឥតោ កប្បេ, អបទានំ បកិត្តយិំ;

ទុគ្គតិំ នាភិជានាមិ, កិត្តនាយ ឥទំ ផលំ.

៣២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អបទានិយោ ថេរោ ឥមា គាថាយោ អភាសិត្ថាតិ.

អបទានិយត្ថេរស្សាបទានំ សត្តមំ.

៨. សត្តាហបព្ពជិតត្ថេរអបទានំ

៣៣. ‘‘វិបស្សិស្ស ភគវតោ, សង្ឃោ សក្កតមានិតោ;

ព្យសនំ មេ អនុប្បត្តំ, ញាតិភេទោ បុរេ អហុ.

៣៤. ‘‘បព្ពជ្ជំ ឧបគន្ត្វាន, ព្យសនុបសមាយហំ;

សត្តាហាភិរតោ តត្ថ, សត្ថុសាសនកម្យតា.

៣៥. ‘‘ឯកនវុតិតោ កប្បេ, យមហំ បព្ពជិំ តទា;

ទុគ្គតិំ នាភិជានាមិ, បព្ពជ្ជាយ ឥទំ ផលំ.

៣៦. ‘‘សត្តសដ្ឋិម្ហិតោ កប្បេ, សត្ត អាសុំ មហីបតី;

សុនិក្ខមាតិ ញាយន្តិ, ចក្កវត្តី មហព្ពលា.

៣៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សត្តាហបព្ពជិតោ ថេរោ ឥមា គាថាយោ អភាសិត្ថាតិ.

សត្តាហបព្ពជិតត្ថេរស្សាបទានំ អដ្ឋមំ.

៩. ពុទ្ធុបដ្ឋាយិកត្ថេរអបទានំ

៣៨. ‘‘វេដម្ភិនីតិ [វេដម្ពរីតិ (សី.), វេធម្ភិនីតិ (ស្យា.)] មេ នាមំ, បិតុសន្តំ [បិតា’សន្តំ (?)] មមំ តទា;

មម ហត្ថំ គហេត្វាន, ឧបានយិ មហាមុនិំ.

៣៩. ‘‘ឥមេមំ ឧទ្ទិសិស្សន្តិ, ពុទ្ធា លោកគ្គនាយកា;

តេហំ ឧបដ្ឋិំ សក្កច្ចំ, បសន្នោ សេហិ បាណិភិ.

៤០. ‘‘ឯកត្តិំសេ ឥតោ កប្បេ, ពុទ្ធេ ឧបដ្ឋហិំ [បរិចរិំ (សី. ស្យា.)] តទា;

ទុគ្គតិំ នាភិជានាមិ, ឧបដ្ឋានស្សិទំ ផលំ.

៤១. ‘‘តេវីសម្ហិ ឥតោ កប្បេ, ចតុរោ អាសុ ខត្តិយា;

សមណុបដ្ឋាកា នាម, ចក្កវត្តី មហព្ពលា.

៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពុទ្ធុបដ្ឋាយិកោ ថេរោ ឥមា គាថាយោ អភាសិត្ថាតិ.

ពុទ្ធុបដ្ឋាយិកត្ថេរស្សាបទានំ នវមំ.

១០. បុព្ពង្គមិយត្ថេរអបទានំ

៤៣. ‘‘ចុល្លាសីតិសហស្សានិ, បព្ពជិម្ហ អកិញ្ចនា;

តេសំ បុព្ពង្គមោ អាសិំ, ឧត្តមត្ថស្ស បត្តិយា.

៤៤. ‘‘សរាគា សភវា [សមោហា (ស្យា.)] ចេតេ, វិប្បសន្នមនាវិលា;

ឧបដ្ឋហិំសុ សក្កច្ចំ, បសន្នា សេហិ បាណិភិ.

៤៥. ‘‘ខីណាសវា វន្តទោសា, កតកិច្ចា អនាសវា;

ផរិំសុ មេត្តចិត្តេន, សយម្ភូ អបរាជិតា.

៤៦. ‘‘តេសំ ឧបដ្ឋហិត្វាន, សម្ពុទ្ធានំ បតិស្សតោ;

មរណញ្ច អនុប្បត្តោ, ទេវត្តញ្ច អគម្ហសេ.

៤៧. ‘‘ចតុន្នវុតិតោ កប្បេ, យំ សីលមនុបាលយិំ;

ទុគ្គតិំ នាភិជានាមិ, សញ្ញមស្ស ឥទំ ផលំ.

៤៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បុព្ពង្គមិយោ ថេរោ ឥមា គាថាយោ អភាសិត្ថាតិ.

បុព្ពង្គមិយត្ថេរស្សាបទានំ ទសមំ.

បណ្ណទាយកវគ្គោ ឯកូនតិំសតិមោ.