១០. បុព្ពង្គមិយត្ថេរអបទានំ

៤៣. ‘‘ចុល្លាសីតិសហស្សានិ, បព្ពជិម្ហ អកិញ្ចនា;

តេសំ បុព្ពង្គមោ អាសិំ, ឧត្តមត្ថស្ស បត្តិយា.

៤៤. ‘‘សរាគា សភវា [សមោហា (ស្យា.)] ចេតេ, វិប្បសន្នមនាវិលា;

ឧបដ្ឋហិំសុ សក្កច្ចំ, បសន្នា សេហិ បាណិភិ.

៤៥. ‘‘ខីណាសវា វន្តទោសា, កតកិច្ចា អនាសវា;

ផរិំសុ មេត្តចិត្តេន, សយម្ភូ អបរាជិតា.

៤៦. ‘‘តេសំ ឧបដ្ឋហិត្វាន, សម្ពុទ្ធានំ បតិស្សតោ;

មរណញ្ច អនុប្បត្តោ, ទេវត្តញ្ច អគម្ហសេ.

៤៧. ‘‘ចតុន្នវុតិតោ កប្បេ, យំ សីលមនុបាលយិំ;

ទុគ្គតិំ នាភិជានាមិ, សញ្ញមស្ស ឥទំ ផលំ.

៤៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បុព្ពង្គមិយោ ថេរោ ឥមា គាថាយោ អភាសិត្ថាតិ.

បុព្ពង្គមិយត្ថេរស្សាបទានំ ទសមំ.

បណ្ណទាយកវគ្គោ ឯកូនតិំសតិមោ.