១. បណ្ណទាយកត្ថេរអបទានំ

១. ‘‘បណ្ណសាលេ និសិន្នោម្ហិ, បណ្ណភោជនភោជនោ;

ឧបវិដ្ឋញ្ច មំ សន្តំ, ឧបាគច្ឆិ មហាឥសិ [មហាមុនិ (សី.)].

២. ‘‘សិទ្ធត្ថោ លោកបជ្ជោតោ, សព្ពលោកតិកិច្ឆកោ;

តស្ស បណ្ណំ មយា ទិន្នំ, និសិន្នំ [និសិន្នស្ស (ស្យា. អដ្ឋ.)] បណ្ណសន្ថរេ.

៣. ‘‘ចតុន្នវុតិតោ កប្បេ, យំ បណ្ណមទទិំ តទា;

ទុគ្គតិំ នាភិជានាមិ, បណ្ណទានស្សិទំ ផលំ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា បណ្ណទាយកោ ថេរោ ឥមា គាថាយោ អភាសិត្ថាតិ.

បណ្ណទាយកត្ថេរស្សាបទានំ បឋមំ.