៨. បណ្ណទាយកត្ថេរអបទានំ

២៨. ‘‘បព្ពតេ ហិមវន្តម្ហិ, វាកចីរធរោ អហំ;

អលោណបណ្ណភក្ខោម្ហិ, និយមេសុ ច សំវុតោ.

២៩. ‘‘បាតរាសេ អនុប្បត្តេ, សិទ្ធត្ថោ ឧបគច្ឆិ មំ;

តាហំ ពុទ្ធស្ស បាទាសិំ, បសន្នោ សេហិ បាណិភិ.

៣០. ‘‘ចតុន្នវុតិតោ កប្បេ, យំ បណ្ណមទទិំ តទា;

ទុគ្គតិំ នាភិជានាមិ, បណ្ណទានស្សិទំ ផលំ.

៣១. ‘‘សត្តវីសតិកប្បម្ហិ, រាជា អាសិំ សទត្ថិយោ [យទត្ថិយោ (សី. ស្យា.)];

សត្តរតនសម្បន្នោ, ចក្កវត្តី មហព្ពលោ.

៣២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បណ្ណទាយកោ ថេរោ ឥមា គាថាយោ អភាសិត្ថាតិ.

បណ្ណទាយកត្ថេរស្សាបទានំ អដ្ឋមំ.