២៦. ថោមកវគ្គោ

១. ថោមកត្ថេរអបទានំ

១. ‘‘ទេវលោកេ ឋិតោ សន្តោ, វិបស្សិស្ស មហេសិនោ;

ធម្មំ សុណិត្វា មុទិតោ, ឥមំ វាចំ អភាសហំ.

២. ‘‘‘នមោ តេ បុរិសាជញ្ញ, នមោ តេ បុរិសុត្តម;

ពហុជ្ជនំ [ពហុំ ជនំ (សី.)] តារយសិ, ទេសេន្តោ អមតំ បទំ’.

៣. ‘‘ឯកនវុតិតោ កប្បេ, យំ វាចមភណិំ តទា;

ទុគ្គតិំ នាភិជានាមិ, ថោមនាយ ឥទំ ផលំ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ថោមកោ ថេរោ ឥមា គាថាយោ អភាសិត្ថាតិ.

ថោមកត្ថេរស្សាបទានំ បឋមំ.

២. ឯកាសនទាយកត្ថេរអបទានំ

៥. ‘‘វិជហិត្វា ទេវវណ្ណំ, សភរិយោ ឥធាគមិំ;

អធិការំ កត្តុកាមោ, ពុទ្ធសេដ្ឋស្ស សាសនេ.

៦. ‘‘ទេវលោ នាម នាមេន, បទុមុត្តរសាវកោ;

តស្ស ភិក្ខា មយា ទិន្នា, វិប្បសន្នេន ចេតសា.

៧. ‘‘សតសហស្សិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, បិណ្ឌបាតស្សិទំ ផលំ.

៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកាសនទាយកោ ថេរោ ឥមា គាថាយោ អភាសិត្ថាតិ.

ឯកាសនទាយកត្ថេរស្សាបទានំ ទុតិយំ.

៣. ចិតកបូជកត្ថេរអបទានំ

៩. ‘‘អានន្ទោ នាម សម្ពុទ្ធោ, សយម្ភូ អបរាជិតោ;

អរញ្ញេ បរិនិព្ពាយិ, អមនុស្សម្ហិ កាននេ.

១០. ‘‘ទេវលោកា ឥធាគន្ត្វា, ចិតំ កត្វានហំ តទា;

សរីរំ តត្ថ ឈាបេសិំ, សក្ការញ្ច អកាសហំ.

១១. ‘‘ឯកនវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

១២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចិតកបូជកោ ថេរោ ឥមា គាថាយោ អភាសិត្ថាតិ.

ចិតកបូជកត្ថេរស្សាបទានំ តតិយំ.

៤. តិចម្បកបុប្ផិយត្ថេរអបទានំ

១៣. ‘‘ហិមវន្តស្សាវិទូរេ, វិកតោ [វិកនោ (សី. ស្យា.)] នាម បព្ពតោ;

តស្ស វេមជ្ឈេ វសតិ, សមណោ ភាវិតិន្ទ្រិយោ.

១៤. ‘‘ទិស្វាន តស្សោបសមំ, វិប្បសន្នេន ចេតសា;

តីណិ ចម្បកបុប្ផានិ, គហេត្វាន សមោកិរិំ.

១៥. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិចម្បកបុប្ផិយោ ថេរោ ឥមា គាថាយោ អភាសិត្ថាតិ.

តិចម្បកបុប្ផិយត្ថេរស្សាបទានំ ចតុត្ថំ.

៥. សត្តបាដលិយត្ថេរអបទានំ

១៧. ‘‘កណិការំវ ជោតន្តំ, និសិន្នំ បព្ពតន្តរេ;

សត្ត បាដលិបុប្ផានិ, ពុទ្ធស្ស អភិរោបយិំ.

១៨. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សត្តបាដលិយោ ថេរោ ឥមា គាថាយោ អភាសិត្ថាតិ.

សត្តបាដលិយត្ថេរស្សាបទានំ បញ្ចមំ.

៦. ឧបាហនទាយកត្ថេរអបទានំ

២០. ‘‘អហោសិំ ចន្ទនោ នាម, សម្ពុទ្ធស្សត្រជោ តទា;

ឯកោបាហនោ មយា ទិន្នោ, ពោធិំ សម្បជ្ជ មេ តុវំ.

២១. ‘‘ឯកនវុតិតោ កប្បេ, យំ បានធិំ [យមុបាហនំ (សី.), យំ បាទុំ (ស្យា.)] ទទិំ តទា;

ទុគ្គតិំ នាភិជានាមិ, ឧបាហនស្សិទំ ផលំ.

២២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧបាហនទាយកោ ថេរោ ឥមា គាថាយោ អភាសិត្ថាតិ.

ឧបាហនទាយកត្ថេរស្សាបទានំ ឆដ្ឋំ.

៧. មញ្ជរិបូជកត្ថេរអបទានំ

២៣. ‘‘មញ្ជរិកំ ករិត្វាន, រថិយំ បដិបជ្ជហំ;

អទ្ទសំ សមណានគ្គំ, ភិក្ខុសង្ឃបុរក្ខតំ.

២៤. ‘‘បសន្នចិត្តោ សុមនោ, បរមាយ ច បីតិយា;

ឧភោ ហត្ថេហិ បគ្គយ្ហ, ពុទ្ធស្ស អភិរោបយិំ.

២៥. ‘‘ទ្វេនវុតេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, បុប្ផបូជាយិទំ ផលំ.

២៦. ‘‘ឥតោ តេសត្តតិកប្បេ, ឯកោ អាសិំ មហីបតិ;

ជោតិយោ នាម នាមេន, ចក្កវត្តី មហព្ពលោ.

២៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មញ្ជរិបូជកោ ថេរោ ឥមា គាថាយោ អភាសិត្ថាតិ.

មញ្ជរិបូជកត្ថេរស្សាបទានំ សត្តមំ.

៨. បណ្ណទាយកត្ថេរអបទានំ

២៨. ‘‘បព្ពតេ ហិមវន្តម្ហិ, វាកចីរធរោ អហំ;

អលោណបណ្ណភក្ខោម្ហិ, និយមេសុ ច សំវុតោ.

២៩. ‘‘បាតរាសេ អនុប្បត្តេ, សិទ្ធត្ថោ ឧបគច្ឆិ មំ;

តាហំ ពុទ្ធស្ស បាទាសិំ, បសន្នោ សេហិ បាណិភិ.

៣០. ‘‘ចតុន្នវុតិតោ កប្បេ, យំ បណ្ណមទទិំ តទា;

ទុគ្គតិំ នាភិជានាមិ, បណ្ណទានស្សិទំ ផលំ.

៣១. ‘‘សត្តវីសតិកប្បម្ហិ, រាជា អាសិំ សទត្ថិយោ [យទត្ថិយោ (សី. ស្យា.)];

សត្តរតនសម្បន្នោ, ចក្កវត្តី មហព្ពលោ.

៣២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បណ្ណទាយកោ ថេរោ ឥមា គាថាយោ អភាសិត្ថាតិ.

បណ្ណទាយកត្ថេរស្សាបទានំ អដ្ឋមំ.

៩. កុដិទាយកត្ថេរអបទានំ

៣៣. ‘‘វិបិនចារី សម្ពុទ្ធោ, រុក្ខមូលេ វសី តទា;

បណ្ណសាលំ ករិត្វាន, អទាសិំ អបរាជិតេ.

៣៤. ‘‘ឯកនវុតិតោ កប្បេ, យំ បណ្ណកុដិកំ អទំ;

ទុគ្គតិំ នាភិជានាមិ, កុដិទានស្សិទំ ផលំ.

៣៥. ‘‘អដ្ឋវីសេ [អដ្ឋតិំសេ (ស្យា.)] ឥតោ កប្បេ, សោឡសាសិំសុ រាជានោ;

សព្ពត្ថ អភិវស្សីតិ, វុច្ចរេ ចក្កវត្តិនោ.

៣៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កុដិទាយកោ ថេរោ ឥមា គាថាយោ អភាសិត្ថាតិ.

កុដិទាយកត្ថេរស្សាបទានំ នវមំ.

១០. អគ្គបុប្ផិយត្ថេរអបទានំ

៣៧. ‘‘សុវណ្ណវណ្ណំ សម្ពុទ្ធំ, និសិន្នំ បព្ពតន្តរេ;

ឱភាសយន្តំ រំសេន [រំសិយា (ស្យា.)], សិខិនំ សិខិនំ យថា.

៣៨. ‘‘អគ្គជំ បុប្ផមាទាយ, ឧបាគច្ឆិំ នរុត្តមំ;

បសន្នចិត្តោ សុមនោ, ពុទ្ធស្ស អភិរោបយិំ.

៣៩. ‘‘ឯកត្តិំសេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤០. ‘‘បញ្ចវីសតិកប្បម្ហិ, អហោសិ អមិតោគតោ [អមិតវ្ហយោ (សី.)];

សត្តរតនសម្បន្នោ, ចក្កវត្តី មហព្ពលោ.

៤១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អគ្គបុប្ផិយោ ថេរោ ឥមា គាថាយោ អភាសិត្ថាតិ.

អគ្គបុប្ផិយត្ថេរស្សាបទានំ ទសមំ.

ថោមកវគ្គោ ឆព្ពីសតិមោ.