៣. ចិតកបូជកត្ថេរអបទានំ

៩. ‘‘អានន្ទោ នាម សម្ពុទ្ធោ, សយម្ភូ អបរាជិតោ;

អរញ្ញេ បរិនិព្ពាយិ, អមនុស្សម្ហិ កាននេ.

១០. ‘‘ទេវលោកា ឥធាគន្ត្វា, ចិតំ កត្វានហំ តទា;

សរីរំ តត្ថ ឈាបេសិំ, សក្ការញ្ច អកាសហំ.

១១. ‘‘ឯកនវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ពុទ្ធបូជាយិទំ ផលំ.

១២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ចិតកបូជកោ ថេរោ ឥមា គាថាយោ អភាសិត្ថាតិ.

ចិតកបូជកត្ថេរស្សាបទានំ តតិយំ.