៤. កិលញ្ជទាយកត្ថេរអបទានំ

១៤. ‘‘តិវរាយំ បុរេ រម្មេ, នឡការោ អហំ តទា;

សិទ្ធត្ថេ លោកបជ្ជោតេ, បសន្នា ជនតា តហិំ.

១៥. ‘‘បូជត្ថំ លោកនាថស្ស, កិលញ្ជំ បរិយេសតិ;

ពុទ្ធបូជំ ករោន្តានំ, កិលញ្ជំ អទទិំ អហំ.

១៦. ‘‘ចតុន្នវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, កិលញ្ជស្ស ឥទំ ផលំ.

១៧. ‘‘សត្តសត្តតិកប្បម្ហិ, រាជា អាសិំ ជលទ្ធរោ [ជុតិន្ធរោ (សី.)];

សត្តរតនសម្បន្នោ, ចក្កវត្តី មហព្ពលោ.

១៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កិលញ្ជទាយកោ ថេរោ ឥមា គាថាយោ អភាសិត្ថាតិ.

កិលញ្ជទាយកត្ថេរស្សាបទានំ ចតុត្ថំ.