២៤. ឧទកាសនវគ្គោ

១. ឧទកាសនទាយកត្ថេរអបទានំ

១. ‘‘អារាមទ្វារា និក្ខម្ម, ផលកំ សន្ថរិំ អហំ;

ឧទកញ្ច ឧបដ្ឋាសិំ, ឧត្តមត្ថស្ស បត្តិយា.

២. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, អាសនេ ចោទកេ ផលំ.

៣. ‘‘ឥតោ បន្នរសេ កប្បេ, អភិសាមសមវ្ហយោ;

សត្តរតនសម្បន្នោ, ចក្កវត្តី មហព្ពលោ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧទកាសនទាយកោ ថេរោ ឥមា គាថាយោ អភាសិត្ថាតិ.

ឧទកាសនទាយកត្ថេរស្សាបទានំ បឋមំ.

២. ភាជនបាលកត្ថេរអបទានំ

៥. ‘‘នគរេ ពន្ធុមតិយា, កុម្ភការោ អហំ តទា;

ភាជនំ អនុបាលេសិំ, ភិក្ខុសង្ឃស្ស តាវទេ.

៦. ‘‘ឯកនវុតិតោ កប្បេ, ភាជនំ អនុបាលយិំ;

ទុគ្គតិំ នាភិជានាមិ, ភាជនស្ស ឥទំ ផលំ.

៧. ‘‘តេបញ្ញាសេ ឥតោ កប្បេ, អនន្តជាលិនាមកោ;

សត្តរតនសម្បន្នោ, ចក្កវត្តី មហព្ពលោ.

៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ភាជនបាលកោ [ភាជនទាយកោ (សី. ស្យា.)] ថេរោ ឥមា គាថាយោ អភាសិត្ថាតិ.

ភាជនបាលកត្ថេរស្សាបទានំ ទុតិយំ.

៣. សាលបុប្ផិយត្ថេរអបទានំ

៩. ‘‘អរុណវតិយា នគរេ, អហោសិំ បូបិកោ តទា;

មម ទ្វារេន គច្ឆន្តំ, សិខិនំ អទ្ទសំ ជិនំ.

១០. ‘‘ពុទ្ធស្ស បត្តំ បគ្គយ្ហ, សាលបុប្ផំ អទាសហំ;

សម្មគ្គតស្ស ពុទ្ធស្ស, វិប្បសន្នេន ចេតសា.

១១. ‘‘ឯកត្តិំសេ ឥតោ កប្បេ, យំ បុប្ផមភិទាសហំ [យំ ខជ្ជកមទាសហំ (សី.), យំ ខជ្ជមភិទាសហំ (ក.) សាលបុប្ផនាមកំ ខជ្ជកំ វា ភវេយ្យ];

ទុគ្គតិំ នាភិជានាមិ, សាលបុប្ផស្សិទំ ផលំ.

១២. ‘‘ឥតោ ចុទ្ទសកប្បម្ហិ, អហោសិំ អមិតញ្ជលោ;

សត្តរតនសម្បន្នោ, ចក្កវត្តី មហព្ពលោ.

១៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សាលបុប្ផិយោ ថេរោ ឥមា គាថាយោ អភាសិត្ថាតិ.

សាលបុប្ផិយត្ថេរស្សាបទានំ តតិយំ.

៤. កិលញ្ជទាយកត្ថេរអបទានំ

១៤. ‘‘តិវរាយំ បុរេ រម្មេ, នឡការោ អហំ តទា;

សិទ្ធត្ថេ លោកបជ្ជោតេ, បសន្នា ជនតា តហិំ.

១៥. ‘‘បូជត្ថំ លោកនាថស្ស, កិលញ្ជំ បរិយេសតិ;

ពុទ្ធបូជំ ករោន្តានំ, កិលញ្ជំ អទទិំ អហំ.

១៦. ‘‘ចតុន្នវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, កិលញ្ជស្ស ឥទំ ផលំ.

១៧. ‘‘សត្តសត្តតិកប្បម្ហិ, រាជា អាសិំ ជលទ្ធរោ [ជុតិន្ធរោ (សី.)];

សត្តរតនសម្បន្នោ, ចក្កវត្តី មហព្ពលោ.

១៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កិលញ្ជទាយកោ ថេរោ ឥមា គាថាយោ អភាសិត្ថាតិ.

កិលញ្ជទាយកត្ថេរស្សាបទានំ ចតុត្ថំ.

៥. វេទិការកត្ថេរអបទានំ

១៩. ‘‘វិបស្សិនោ ភគវតោ, ពោធិយា បាទបុត្តមេ;

បសន្នចិត្តោ សុមនោ, ការេសិំ វេទិកំ អហំ.

២០. ‘‘ឯកនវុតិតោ កប្បេ, ការេសិំ វេទិកំ អហំ;

ទុគ្គតិំ នាភិជានាមិ, វេទិកាយ ឥទំ ផលំ.

២១. ‘‘ឥតោ ឯកាទសេ កប្បេ, អហោសិំ សូរិយស្សមោ;

សត្តរត្តនសម្បន្នោ, ចក្កវត្តី មហព្ពលោ.

២២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វេទិការកោ ថេរោ ឥមា គាថាយោ អភាសិត្ថាតិ.

វេទិការកត្ថេរស្សាបទានំ បញ្ចមំ.

៦. វណ្ណការត្ថេរអបទានំ

២៣. ‘‘នគរេ អរុណវតិយា, វណ្ណការោ អហំ តទា;

ចេតិយេ ទុស្សភណ្ឌានិ, នានាវណ្ណំ រជេសហំ [រជិំ អហំ (ក.), រជេមហំ (ស្យា.)].

២៤. ‘‘ឯកត្តិំសេ ឥតោ កប្បេ, យំ វណ្ណំ រជយិំ តទា;

ទុគ្គតិំ នាភិជានាមិ, វណ្ណទានស្សិទំ ផលំ.

២៥. ‘‘ឥតោ តេវីសតិកប្បេ, វណ្ណសម [ចន្ទុបម (សី.), ចន្ទសម (ស្យា.)] សនាមកោ;

សត្តរតនសម្បន្នោ, ចក្កវត្តី មហព្ពលោ.

២៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វណ្ណការោ ថេរោ ឥមា គាថាយោ អភាសិត្ថាតិ.

វណ្ណការត្ថេរស្សាបទានំ ឆដ្ឋំ.

៧. បិយាលបុប្ផិយត្ថេរអបទានំ

២៧. ‘‘មិគលុទ្ទោ បុរេ អាសិំ, អរញ្ញេ កាននេ អហំ;

បិយាលំ បុប្ផិតំ ទិស្វា, គតមគ្គេ ខិបិំ អហំ.

២៨. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បិយាលបុប្ផិយោ ថេរោ ឥមា គាថាយោ អភាសិត្ថាតិ.

បិយាលបុប្ផិយត្ថេរស្សាបទានំ សត្តមំ.

៨. អម្ពយាគទាយកត្ថេរអបទានំ

៣០. ‘‘សកេ សិប្បេ អបត្ថទ្ធោ, អគមំ កាននំ អហំ;

សម្ពុទ្ធំ យន្តំ ទិស្វាន, អម្ពយាគំ អទាសហំ.

៣១. ‘‘ឯកនវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, អម្ពយាគស្សិទំ ផលំ.

៣២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អម្ពយាគទាយកោ ថេរោ ឥមា គាថាយោ អភាសិត្ថាតិ.

អម្ពយាគទាយកត្ថេរស្សាបទានំ អដ្ឋមំ.

៩. ជគតិការកត្ថេរអបទានំ

៣៣. ‘‘និព្ពុតេ លោកនាថម្ហិ, អត្ថទស្សិ នរុត្តមេ;

ជគតី ការិតា មយ្ហំ, ពុទ្ធស្ស ថូបមុត្តមេ.

៣៤. ‘‘អដ្ឋារសេ កប្បសតេ, យំ កម្មមករិំ តទា;

ទុគ្គតិំ នាភិជានាមិ, ជគតិយា ឥទំ ផលំ.

៣៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ជគតិការកោ ថេរោ ឥមា គាថាយោ អភាសិត្ថាតិ.

ជគតិការកត្ថេរស្សាបទានំ នវមំ.

១០. វាសិទាយកត្ថេរអបទានំ

៣៦. ‘‘កម្មារោហំ បុរេ អាសិំ, តិវរាយំ បុរុត្តមេ;

ឯកា វាសិ មយា ទិន្នា, សយម្ភុំ អបរាជិតំ [សយម្ភុម្ហិបរាជិតេ (?)].

៣៧. ‘‘ចតុន្នវុតិតោ កប្បេ, យំ វាសិមទទិំ តទា;

ទុគ្គតិំ នាភិជានាមិ, វាសិទានស្សិទំ ផលំ.

៣៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វាសិទាយកោ ថេរោ ឥមា គាថាយោ អភាសិត្ថាតិ.

វាសិទាយកត្ថេរស្សាបទានំ ទសមំ.

ឧទកាសនវគ្គោ ចតុវីសតិមោ.