២៥. តុវរទាយកវគ្គោ

១. តុវរទាយកត្ថេរអបទានំ

១. ‘‘មិគលុទ្ទោ បុរេ អាសិំ, អរញ្ញេ កាននេ អហំ;

ភរិត្វា តុវរមាទាយ [ភរិត្វា តុរវមាទាយ (ក.), ភជ្ជិតំ តុវរមាទាយ (?) ឯត្ថ តុវរន្តិ មុគ្គកលាយសទិសំ តុវរដ្ឋិន្តិ តទដ្ឋកថា; តុវរោ ធញ្ញភេទេតិ សក្កតាភិធានេ], សង្ឃស្ស អទទិំ អហំ.

២. ‘‘ឯកនវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, តុវរស្ស ឥទំ ផលំ.

៣. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា តុវរទាយកោ ថេរោ ឥមា គាថាយោ អភាសិត្ថាតិ.

តុវរទាយកត្ថេរស្សាបទានំ បឋមំ.

២. នាគកេសរិយត្ថេរអបទានំ

៤. ‘‘ធនុំ អទ្វេជ្ឈំ កត្វាន, វនមជ្ឈោគហិំ អហំ;

កេសរំ ឱគតំ [ឱសរំ (ស្យា.), ឱសដំ (សី.)] ទិស្វា, បតបត្តំ សមុដ្ឋិតំ.

៥. ‘‘ឧភោ ហត្ថេហិ បគ្គយ្ហ, សិរេ កត្វាន អញ្ជលិំ;

ពុទ្ធស្ស អភិរោបេសិំ, តិស្សស្ស លោកពន្ធុនោ.

៦. ‘‘ទ្វេនវុតេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៧. ‘‘តេសត្តតិម្ហិ កប្បម្ហិ [សត្តសត្តតិមេ កប្បេ (ស្យា.)], សត្ត កេសរនាមកា;

សត្តរតនសម្បន្នា, ចក្កវត្តី មហព្ពលា.

៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា នាគកេសរិយោ ថេរោ ឥមា គាថាយោ អភាសិត្ថាតិ.

នាគកេសរិយត្ថេរស្សាបទានំ ទុតិយំ.

៣. នឡិនកេសរិយត្ថេរអបទានំ

៩. ‘‘ជាតស្សរស្ស វេមជ្ឈេ, វសាមិ ជលកុក្កុដោ;

អទ្ទសាហំ [អថទ្ទសំ (សី. ស្យា.)] ទេវទេវំ, គច្ឆន្តំ អនិលញ្ជសេ.

១០. ‘‘តុណ្ឌេន កេសរិំ [កេសរំ (ស្យា.)] គយ្ហ, វិប្បសន្នេន ចេតសា;

ពុទ្ធស្ស អភិរោបេសិំ, តិស្សស្ស លោកពន្ធុនោ.

១១. ‘‘ទ្វេនវុតេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១២. ‘‘តេសត្តតិម្ហិ កប្បម្ហិ, សត្ត កេសរនាមកា [សតបត្តសនាមកោ (សី. ស្យា.)];

សត្តរតនសម្បន្នា, ចក្កវត្តី មហព្ពលា.

១៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា នឡិនកេសរិយោ ថេរោ ឥមា គាថាយោ អភាសិត្ថាតិ.

នឡិនកេសរិយត្ថេរស្សាបទានំ តតិយំ.

៤. វិរវបុប្ផិយត្ថេរអបទានំ

១៤. ‘‘ខីណាសវសហស្សេហិ, និយ្យាតិ លោកនាយកោ;

វិរវបុប្ផមាទាយ [វិរវិបុប្ផំ បគ្គយ្ហ (សី.)], ពុទ្ធស្ស អភិរោបយិំ.

១៥. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា វិរវបុប្ផិយោ ថេរោ ឥមា គាថាយោ អភាសិត្ថាតិ.

វិរវបុប្ផិយត្ថេរស្សាបទានំ ចតុត្ថំ.

៥. កុដិធូបកត្ថេរអបទានំ

១៧. ‘‘សិទ្ធត្ថស្ស ភគវតោ, អហោសិំ កុដិគោបកោ;

កាលេន កាលំ ធូបេសិំ, បសន្នោ សេហិ បាណិភិ.

១៨. ‘‘ចតុន្នវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ធូបទានស្សិទំ [ពុទ្ធបូជាយិទំ (សី.)] ផលំ.

១៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កុដិធូបកោ ថេរោ ឥមា គាថាយោ អភាសិត្ថាតិ.

កុដិធូបកត្ថេរស្សាបទានំ បញ្ចមំ.

៦. បត្តទាយកត្ថេរអបទានំ

២០. ‘‘បរមេន ទមថេន, សិទ្ធត្ថស្ស មហេសិនោ;

បត្តទានំ មយា ទិន្នំ, ឧជុភូតស្ស តាទិនោ.

២១. ‘‘ចតុន្នវុតិតោ កប្បេ, យំ ទានមទទិំ តទា;

ទុគ្គតិំ នាភិជានាមិ, បត្តទានស្សិទំ ផលំ.

២២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បត្តទាយកោ ថេរោ ឥមា គាថាយោ អភាសិត្ថាតិ.

បត្តទាយកត្ថេរស្សាបទានំ ឆដ្ឋំ.

៧. ធាតុបូជកត្ថេរអបទានំ

២៣. ‘‘និព្ពុតេ លោកនាថម្ហិ, សិទ្ធត្ថម្ហិ នរុត្តមេ;

ឯកា ធាតុ មយា លទ្ធា, ទ្វិបទិន្ទស្ស តាទិនោ.

២៤. ‘‘តាហំ ធាតុំ គហេត្វាន, ពុទ្ធស្សាទិច្ចពន្ធុនោ;

បញ្ចវស្សេ បរិចរិំ, តិដ្ឋន្តំវ នរុត្តមំ.

២៥. ‘‘ចតុន្នវុតិតោ កប្បេ, យំ ធាតុំ បូជយិំ តទា;

ទុគ្គតិំ នាភិជានាមិ, ធាតុបដ្ឋហនេ ផលំ.

២៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ធាតុបូជកោ ថេរោ ឥមា គាថាយោ អភាសិត្ថាតិ.

ធាតុបូជកត្ថេរស្សាបទានំ សត្តមំ.

៨. សត្តលិបុប្ផបូជកត្ថេរអបទានំ

២៧. ‘‘សត្ត សត្តលិបុប្ផានិ, សីសេ កត្វានហំ តទា;

ពុទ្ធស្ស អភិរោបេសិំ, វេស្សភុម្ហិ នរុត្តមេ [វិភត្តិវិបល្លាសោ ចិន្តេតព្ពោ].

២៨. ‘‘ឯកត្តិំសេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សត្តលិបុប្ផបូជកោ ថេរោ ឥមា គាថាយោ អភាសិត្ថាតិ.

សត្តលិបុប្ផបូជកត្ថេរស្សាបទានំ អដ្ឋមំ.

៩. ពិម្ពិជាលិយត្ថេរអបទានំ

៣០. ‘‘បទុមុត្តរោ នាម ជិនោ, សយម្ភូ អគ្គបុគ្គលោ;

ចតុសច្ចំ បកាសេតិ, ទីបេតិ អមតំ បទំ.

៣១. ‘‘ពិម្ពិជាលកបុប្ផានិ [ពិម្ពជាលកបុប្ផានិ (ក.)], បុថុ កត្វានហំ តទា;

ពុទ្ធស្ស អភិរោបេសិំ, ទ្វិបទិន្ទស្ស តាទិនោ.

៣២. ‘‘អដ្ឋសដ្ឋិម្ហិតោ កប្បេ, ចតុរោ កិញ្ជកេសរា;

សត្តរតនសម្បន្នា, ចក្កវត្តី មហព្ពលា.

៣៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ពិម្ពិជាលិយោ ថេរោ ឥមា គាថាយោ អភាសិត្ថាតិ.

ពិម្ពិជាលិយត្ថេរស្សាបទានំ នវមំ.

១០. ឧទ្ទាលកទាយកត្ថេរអបទានំ

៣៤. ‘‘កកុធោ នាម នាមេន, សយម្ភូ អបរាជិតោ;

បវនា និក្ខមិត្វាន, អនុប្បត្តោ មហានទិំ.

៣៥. ‘‘ឧទ្ទាលកំ គហេត្វាន, សយម្ភុស្ស អទាសហំ;

សំយតស្សុជុភូតស្ស, បសន្នមានសោ អហំ.

៣៦. ‘‘ឯកត្តិំសេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, បុប្ផទានស្សិទំ ផលំ.

៣៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧទ្ទាលកទាយកោ ថេរោ ឥមា គាថាយោ អភាសិត្ថាតិ.

ឧទ្ទាលកទាយកត្ថេរស្សាបទានំ ទសមំ.

តុវរទាយកវគ្គោ បញ្ចវីសតិមោ.