១. ឧទកាសនទាយកត្ថេរអបទានំ

១. ‘‘អារាមទ្វារា និក្ខម្ម, ផលកំ សន្ថរិំ អហំ;

ឧទកញ្ច ឧបដ្ឋាសិំ, ឧត្តមត្ថស្ស បត្តិយា.

២. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, អាសនេ ចោទកេ ផលំ.

៣. ‘‘ឥតោ បន្នរសេ កប្បេ, អភិសាមសមវ្ហយោ;

សត្តរតនសម្បន្នោ, ចក្កវត្តី មហព្ពលោ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧទកាសនទាយកោ ថេរោ ឥមា គាថាយោ អភាសិត្ថាតិ.

ឧទកាសនទាយកត្ថេរស្សាបទានំ បឋមំ.