១. ហត្ថិទាយកត្ថេរអបទានំ

១. ‘‘សិទ្ធត្ថស្ស ភគវតោ, ទ្វិបទិន្ទស្ស តាទិនោ;

នាគសេដ្ឋោ មយា ទិន្នោ, ឦសាទន្តោ ឧរូឡ្ហវា.

២. ‘‘ឧត្តមត្ថំ អនុភោមិ, សន្តិបទមនុត្តរំ;

នាគទានំ [អគ្គទានំ (សី. ក.)] មយា ទិន្នំ, សព្ពលោកហិតេសិនោ.

៣. ‘‘ចតុន្នវុតិតោ កប្បេ, យំ នាគ [ទាន (សី. ក.)] មទទិំ តទា;

ទុគ្គតិំ នាភិជានាមិ, នាគទានស្សិទំ ផលំ.

៤. ‘‘អដ្ឋសត្តតិកប្បម្ហិ, សោឡសាសិំសុ ខត្តិយា;

សមន្តបាសាទិកា នាម, ចក្កវត្តី មហព្ពលា.

៥. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ហត្ថិទាយកោ ថេរោ ឥមា គាថាយោ អភាសិត្ថាតិ.

ហត្ថិទាយកត្ថេរស្សាបទានំ បឋមំ.