១០. បាបនិវារិយត្ថេរអបទានំ

៤៤. ‘‘តិស្សស្ស តុ ភគវតោ, ទេវទេវស្ស តាទិនោ;

ឯកច្ឆត្តំ មយា ទិន្នំ, វិប្បសន្នេន ចេតសា.

៤៥. ‘‘និវុតំ ហោតិ មេ បាបំ, កុសលស្សុបសម្បទា;

អាកាសេ ឆត្តំ ធារេន្តិ, បុព្ពកម្មស្សិទំ ផលំ.

៤៦. ‘‘ចរិមំ វត្តតេ មយ្ហំ, ភវា សព្ពេ សមូហតា;

ធារេមិ អន្តិមំ ទេហំ, សម្មាសម្ពុទ្ធសាសនេ.

៤៧. ‘‘ទ្វេនវុតេ ឥតោ កប្បេ, យំ ឆត្តមទទិំ តទា;

ទុគ្គតិំ នាភិជានាមិ, ឆត្តទានស្សិទំ ផលំ.

៤៨. ‘‘ទ្វេសត្តតិម្ហិតោ កប្បេ, អដ្ឋាសិំសុ ជនាធិបា;

មហានិទាននាមេន, រាជានោ ចក្កវត្តិនោ.

៤៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បាបនិវារិយោ [វាតាតបនិវារិយោ (សី.)] ថេរោ ឥមា គាថាយោ អភាសិត្ថាតិ;

បាបនិវារិយត្ថេរស្សាបទានំ ទសមំ.

កណិការបុប្ផិយវគ្គោ ឯកវីសតិមោ.