២១. កណិការបុប្ផិយវគ្គោ

១. កណិការបុប្ផិយត្ថេរអបទានំ

១. ‘‘កណិការំ បុប្ផិតំ ទិស្វា, ឱចិនិត្វានហំ តទា;

តិស្សស្ស អភិរោបេសិំ, ឱឃតិណ្ណស្ស តាទិនោ.

២. ‘‘ទ្វេនវុតេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣. ‘‘បញ្ចត្តិំសេ ឥតោ កប្បេ, អរុណបាណីតិ វិស្សុតោ;

សត្តរតនសម្បន្នោ, ចក្កវត្តី មហព្ពលោ.

៤. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា កណិការបុប្ផិយោ ថេរោ ឥមា គាថាយោ អភាសិត្ថាតិ.

កណិការបុប្ផិយត្ថេរស្សាបទានំ បឋមំ.

២. មិនេលបុប្ផិយត្ថេរអបទានំ

៥. ‘‘សុវណ្ណវណ្ណោ ភគវា, សតរំសី បតាបវា;

ចង្កមនំ សមារូឡ្ហោ, មេត្តចិត្តោ សិខីសភោ.

៦. ‘‘បសន្នចិត្តោ សុមនោ, វន្ទិត្វា [ថោមេត្វា (ស្យា.)] ញាណមុត្តមំ;

មិនេលបុប្ផំ បគ្គយ្ហ, ពុទ្ធស្ស អភិរោបយិំ.

៧. ‘‘ឯកត្តិំសេ ឥតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៨. ‘‘ឯកូនតិំសកប្បម្ហិ, សុមេឃឃននាមកោ;

សត្តរតនសម្បន្នោ, ចក្កវត្តី មហព្ពលោ.

៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មិនេលបុប្ផិយោ ថេរោ ឥមា គាថាយោ អភាសិត្ថាតិ.

មិនេលបុប្ផិយត្ថេរស្សាបទានំ ទុតិយំ.

៣. កិង្កណិបុប្ផិយត្ថេរអបទានំ

១០. ‘‘កញ្ចនគ្ឃិយសង្កាសោ, សព្ពញ្ញូ លោកនាយកោ;

ឱទកំ ទហមោគ្គយ្ហ, សិនាយិ លោកនាយកោ.

១១. ‘‘បគ្គយ្ហ កិង្កណិំ [កិង្កិណិំ (សី.)] បុប្ផំ, វិបស្សិស្សាភិរោបយិំ;

ឧទគ្គចិត្តោ សុមនោ, ទ្វិបទិន្ទស្ស តាទិនោ.

១២. ‘‘ឯកនវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

១៣. ‘‘សត្តវីសតិកប្បម្ហិ, រាជា ភីមរថោ អហុ;

សត្តរតនសម្បន្នោ, ចក្កវត្តី មហព្ពលោ.

១៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កិង្កណិបុប្ផិយោ [កិង្កិណិកបុប្ផិយោ (សី.)] ថេរោ ឥមា គាថាយោ អភាសិត្ថាតិ.

កិង្កណិបុប្ផិយត្ថេរស្សាបទានំ តតិយំ.

៤. តរណិយត្ថេរអបទានំ

១៥. ‘‘អត្ថទស្សី តុ ភគវា, ទ្វិបទិន្ទោ នរាសភោ;

បុរក្ខតោ សាវកេហិ, គង្គាតីរមុបាគមិ.

១៦. ‘‘សមតិត្តិ កាកបេយ្យា, គង្គា អាសិ ទុរុត្តរា;

ឧត្តារយិំ ភិក្ខុសង្ឃំ, ពុទ្ធញ្ច ទ្វិបទុត្តមំ.

១៧. ‘‘អដ្ឋារសេ កប្បសតេ, យំ កម្មមករិំ តទា;

ទុគ្គតិំ នាភិជានាមិ, តរណាយ ឥទំ ផលំ.

១៨. ‘‘តេរសេតោ កប្បសតេ, បញ្ច សព្ពោភវា [សព្ភោគវា (សី.)] អហុំ;

សត្តរតនសម្បន្នា, ចក្កវត្តី មហព្ពលា.

១៩. ‘‘បច្ឆិមេ ច ភវេ អស្មិំ, ជាតោហំ ព្រាហ្មណេ កុលេ;

សទ្ធិំ តីហិ សហាយេហិ, បព្ពជិំ សត្ថុ សាសនេ.

២០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តរណិយោ ថេរោ ឥមា គាថាយោ អភាសិត្ថាតិ;

តរណិយត្ថេរស្សាបទានំ ចតុត្ថំ.

៥. និគ្គុណ្ឌិបុប្ផិយត្ថេរអបទានំ

២១. ‘‘វិបស្សិស្ស ភគវតោ, អាសិមារាមិកោ អហំ;

និគ្គុណ្ឌិបុប្ផំ បគ្គយ្ហ, ពុទ្ធស្ស អភិរោបយិំ.

២២. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

២៣. ‘‘បញ្ចវីសេ [បញ្ចតិំសេ (សី. ស្យា.)] ឥតោ កប្បេ, ឯកោ អាសិំ ជនាធិបោ;

មហាបតាបនាមេន, ចក្កវត្តី មហព្ពលោ.

២៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា និគ្គុណ្ឌិបុប្ផិយោ ថេរោ ឥមា គាថាយោ អភាសិត្ថាតិ.

និគ្គុណ្ឌិបុប្ផិយត្ថេរស្សាបទានំ បញ្ចមំ.

៦. ឧទកទាយកត្ថេរអបទានំ

២៥. ‘‘ភុញ្ជន្តំ សមណំ ទិស្វា, វិប្បសន្នមនាវិលំ;

ឃដេនោទកមាទាយ, សិទ្ធត្ថស្ស អទាសហំ.

២៦. ‘‘និម្មលោ ហោមហំ អជ្ជ, វិមលោ ខីណសំសយោ;

ភវេ និព្ពត្តមានម្ហិ, ផលំ និព្ពត្តតេ មម [សុភំ (សី.)].

២៧. ‘‘ចតុន្នវុតិតោ កប្បេ, ឧទកំ យមទាសហំ [យំ តទា អទំ (សី.), អទទិំ តទា (ស្យា.)];

ទុគ្គតិំ នាភិជានាមិ, ទកទានស្សិទំ ផលំ.

២៨. ‘‘ឯកសដ្ឋិម្ហិតោ កប្បេ, ឯកោវ វិមលោ អហុ;

សត្តរតនសម្បន្នោ, ចក្កវត្តី មហព្ពលោ.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧទកទាយកោ ថេរោ ឥមា គាថាយោ អភាសិត្ថាតិ.

ឧទកទាយកត្ថេរស្សាបទានំ ឆដ្ឋំ.

៧. សលលមាលិយត្ថេរអបទានំ

៣០. ‘‘កណិការំវ ជោតន្តំ, និសិន្នំ បព្ពតន្តរេ;

ឱភាសេន្តំ ទិសា សព្ពា, សិទ្ធត្ថំ នរសារថិំ.

៣១. ‘‘ធនុំ អទ្វេជ្ឈំ កត្វាន, ឧសុំ សន្នយ្ហហំ តទា;

បុប្ផំ សវណ្ដំ ឆេត្វាន, ពុទ្ធស្ស អភិរោបយិំ.

៣២. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៣. ‘‘ឯកបញ្ញាសិតោ កប្បេ, ឯកោ អាសិំ ជុតិន្ធរោ;

សត្តរតនសម្បន្នោ, ចក្កវត្តី មហព្ពលោ.

៣៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សលលមាលិយោ ថេរោ ឥមា គាថាយោ អភាសិត្ថាតិ.

សលលមាលិយត្ថេរស្សាបទានំ សត្តមំ.

៨. កោរណ្ឌបុប្ផិយត្ថេរអបទានំ

៣៥. ‘‘អក្កន្តញ្ច បទំ ទិស្វា, ចក្កាលង្ការភូសិតំ;

បទេនានុបទំ យន្តោ, វិបស្សិស្ស មហេសិនោ.

៣៦. ‘‘កោរណ្ឌំ បុប្ផិតំ ទិស្វា, សមូលំ បូជិតំ មយា;

ហដ្ឋោ ហដ្ឋេន ចិត្តេន, អវន្ទិំ បទមុត្តមំ.

៣៧. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៨. ‘‘សត្តបញ្ញាសកប្បម្ហិ, ឯកោ វីតមលោ អហុំ;

សត្តរតនសម្បន្នោ, ចក្កវត្តី មហព្ពលោ.

៣៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កោរណ្ឌបុប្ផិយោ ថេរោ ឥមា គាថាយោ អភាសិត្ថាតិ.

កោរណ្ឌបុប្ផិយត្ថេរស្សាបទានំ អដ្ឋមំ.

៩. អាធារទាយកត្ថេរអបទានំ

៤០. ‘‘អាធារកំ មយា ទិន្នំ, សិខិនោ លោកពន្ធុនោ;

ធារេមិ បថវិំ សព្ពំ, កេវលំ វសុធំ ឥមំ.

៤១. ‘‘កិលេសា ឈាបិតា មយ្ហំ, ភវា សព្ពេ សមូហតា;

ធារេមិ អន្តិមំ ទេហំ, សម្មាសម្ពុទ្ធសាសនេ.

៤២. ‘‘សត្តវីសេ ឥតោ កប្បេ, អហេសុំ ចតុរោ ជនា;

សមន្តវរណា នាម, ចក្កវត្តី មហព្ពលា.

៤៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អាធារទាយកោ [បរិយាទានិយោ (ក.)] ថេរោ ឥមា គាថាយោ អភាសិត្ថាតិ.

អាធារទាយកត្ថេរស្សាបទានំ នវមំ.

១០. បាបនិវារិយត្ថេរអបទានំ

៤៤. ‘‘តិស្សស្ស តុ ភគវតោ, ទេវទេវស្ស តាទិនោ;

ឯកច្ឆត្តំ មយា ទិន្នំ, វិប្បសន្នេន ចេតសា.

៤៥. ‘‘និវុតំ ហោតិ មេ បាបំ, កុសលស្សុបសម្បទា;

អាកាសេ ឆត្តំ ធារេន្តិ, បុព្ពកម្មស្សិទំ ផលំ.

៤៦. ‘‘ចរិមំ វត្តតេ មយ្ហំ, ភវា សព្ពេ សមូហតា;

ធារេមិ អន្តិមំ ទេហំ, សម្មាសម្ពុទ្ធសាសនេ.

៤៧. ‘‘ទ្វេនវុតេ ឥតោ កប្បេ, យំ ឆត្តមទទិំ តទា;

ទុគ្គតិំ នាភិជានាមិ, ឆត្តទានស្សិទំ ផលំ.

៤៨. ‘‘ទ្វេសត្តតិម្ហិតោ កប្បេ, អដ្ឋាសិំសុ ជនាធិបា;

មហានិទាននាមេន, រាជានោ ចក្កវត្តិនោ.

៤៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា បាបនិវារិយោ [វាតាតបនិវារិយោ (សី.)] ថេរោ ឥមា គាថាយោ អភាសិត្ថាតិ;

បាបនិវារិយត្ថេរស្សាបទានំ ទសមំ.

កណិការបុប្ផិយវគ្គោ ឯកវីសតិមោ.