៨. មុដ្ឋិបូជកត្ថេរអបទានំ

៤២. ‘‘សុមេធោ នាម ភគវា, លោកជេដ្ឋោ នរាសភោ;

បច្ឆិមេ អនុកម្បាយ, បធានំ បទហី ជិនោ.

៤៣. ‘‘តស្ស ចង្កមមានស្ស, ទ្វិបទិន្ទស្ស តាទិនោ;

គិរិនេលស្ស បុប្ផានំ, មុដ្ឋិំ ពុទ្ធស្ស រោបយិំ.

៤៤. ‘‘តេន ចិត្តប្បសាទេន, សុក្កមូលេន ចោទិតោ;

តិំសកប្បសហស្សានិ, ទុគ្គតិំ នុបបជ្ជហំ.

៤៥. ‘‘តេវីសតិកប្បសតេ, សុនេលោ នាម ខត្តិយោ;

សត្តរតនសម្បន្នោ, ឯកោ អាសិំ មហព្ពលោ.

៤៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មុដ្ឋិបូជកោ ថេរោ ឥមា គាថាយោ អភាសិត្ថាតិ.

មុដ្ឋិបូជកត្ថេរស្សាបទានំ អដ្ឋមំ.