៩. កិំកណិកបុប្ផិយត្ថេរអបទានំ

៤៧. ‘‘សុមង្គលោតិ នាមេន, សយម្ភូ អបរាជិតោ;

បវនា និក្ខមិត្វាន, នគរំ បាវិសី ជិនោ.

៤៨. ‘‘បិណ្ឌចារំ ចរិត្វាន, និក្ខម្ម នគរា មុនិ;

កតកិច្ចោវ សម្ពុទ្ធោ, សោ វសី វនមន្តរេ.

៤៩. ‘‘កិំកណិបុប្ផំ បគ្គយ្ហ, ពុទ្ធស្ស អភិរោបយិំ;

បសន្នចិត្តោ សុមនោ, សយម្ភុស្ស មហេសិនោ.

៥០. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៥១. ‘‘ឆឡាសីតិម្ហិតោ កប្បេ, អបិលាសិសនាមកោ;

សត្តរតនសម្បន្នោ, ចក្កវត្តី មហព្ពលោ.

៥២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា កិំកណិកបុប្ផិយោ ថេរោ ឥមា គាថាយោ អភាសិត្ថាតិ.

កិំកណិកបុប្ផិយត្ថេរស្សាបទានំ នវមំ.