៧. តិន្ទុកទាយកត្ថេរអបទានំ

៣៥. ‘‘គិរិទុគ្គចរោ អាសិំ, មក្កដោ ថាមវេគិកោ;

ផលិនំ តិន្ទុកំ ទិស្វា, ពុទ្ធសេដ្ឋំ អនុស្សរិំ.

៣៦. ‘‘និក្ខមិត្វា កតិបាហំ, វិចិនិំ លោកនាយកំ;

បសន្នចិត្តោ សុមនោ, សិទ្ធត្ថំ តិភវន្តគុំ.

៣៧. ‘‘មម សង្កប្បមញ្ញាយ, សត្ថា លោកេ អនុត្តរោ;

ខីណាសវសហស្សេហិ, អាគច្ឆិ មម សន្តិកំ.

៣៨. ‘‘បាមោជ្ជំ ជនយិត្វាន, ផលហត្ថោ ឧបាគមិំ;

បដិគ្គហេសិ ភគវា, សព្ពញ្ញូ វទតំ វរោ.

៣៩. ‘‘ចតុន្នវុតិតោ កប្បេ, យំ ផលំ អទទិំ តទា;

ទុគ្គតិំ នាភិជានាមិ, ផលទានស្សិទំ ផលំ.

៤០. ‘‘សត្តបញ្ញាសកប្បម្ហិ, ឧបនន្ទសនាមកោ;

សត្តរតនសម្បន្នោ, ចក្កវត្តី មហព្ពលោ.

៤១. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិន្ទុកទាយកោ ថេរោ ឥមា គាថាយោ អភាសិត្ថាតិ.

តិន្ទុកទាយកត្ថេរស្សាបទានំ សត្តមំ.