៧. ឧបសេនវង្គន្តបុត្តត្ថេរអបទានំ

៨៦. ‘‘បទុមុត្តរំ ភគវន្តំ, លោកជេដ្ឋំ នរាសភំ;

បព្ភារម្ហិ និសីទន្តំ, ឧបគច្ឆិំ នរុត្តមំ.

៨៧. ‘‘កណិការបុប្ផំ [កណិការំ បុប្ផិតំ (សី. ស្យា.)] ទិស្វា, វណ្ដេ ឆេត្វានហំ តទា;

អលង្ករិត្វា ឆត្តម្ហិ, ពុទ្ធស្ស អភិរោបយិំ.

៨៨. ‘‘បិណ្ឌបាតញ្ច បាទាសិំ, បរមន្នំ សុភោជនំ;

ពុទ្ធេន នវមេ តត្ថ, សមណេ អដ្ឋ ភោជយិំ.

៨៩. ‘‘អនុមោទិ មហាវីរោ, សយម្ភូ អគ្គបុគ្គលោ;

ឥមិនា ឆត្តទានេន, បរមន្នបវេច្ឆនា.

៩០. ‘‘តេន ចិត្តប្បសាទេន, សម្បត្តិមនុភោស្សសិ;

ឆត្តិំសក្ខត្តុំ ទេវិន្ទោ, ទេវរជ្ជំ ករិស្សតិ.

៩១. ‘‘ឯកវីសតិក្ខត្តុញ្ច, ចក្កវត្តី ភវិស្សតិ;

បទេសរជ្ជំ វិបុលំ, គណនាតោ អសង្ខិយំ.

៩២. ‘‘សតសហស្សិតោ កប្បេ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ [យំ វទន្តិ សុមេធោតិ, ភូរិបញ្ញំ សុមេធសំ; កប្បេតោ សតសហស្សេ, ឯស ពុទ្ធោ ភវិស្សតិ; (ក.)].

៩៣. ‘‘សាសនេ ទិព្ពមានម្ហិ, មនុស្សត្តំ គមិស្សតិ;

តស្ស ធម្មេសុ ទាយាទោ, ឱរសោ ធម្មនិម្មិតោ.

៩៤. ‘‘ឧបសេនោតិ នាមេន, ហេស្សតិ សត្ថុ សាវកោ;

[ឥទំ បាទទ្វយំ ថេរគាថាអដ្ឋកថាយមេវ ទិស្សតិ] សមន្តបាសាទិកត្តា, អគ្គដ្ឋានេ ឋបេស្សតិ

[ឥទំ បាទទ្វយំ ថេរគាថាអដ្ឋកថាយមេវ ទិស្សតិ].

៩៥. ‘‘ចរិមំ វត្តតេ មយ្ហំ, ភវា សព្ពេ សមូហតា;

ធារេមិ អន្តិមំ ទេហំ, ជេត្វា មារំ សវាហនំ [សវាហិនិំ (?)].

៩៦. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧបសេនោ វង្គន្តបុត្តោ ថេរោ ឥមា គាថាយោ អភាសិត្ថាតិ.

ឧបសេនវង្គន្តបុត្តត្ថេរស្សាបទានំ សត្តមំ.

តតិយភាណវារំ.