៨. រដ្ឋបាលត្ថេរអបទានំ

៩៧. ‘‘បទុមុត្តរស្ស ភគវតោ, លោកជេដ្ឋស្ស តាទិនោ;

វរនាគោ មយា ទិន្នោ, ឦសាទន្តោ ឧរូឡ្ហវា.

៩៨. ‘‘សេតច្ឆត្តោ បសោភិតោ, សកប្បនោ សហត្ថិបោ;

អគ្ឃាបេត្វាន តំ សព្ពំ, សង្ឃារាមំ អការយិំ.

៩៩. ‘‘ចតុបញ្ញាសសហស្សានិ, បាសាទេ ការយិំ អហំ;

មហោឃទានំ [មហាភត្តំ (សី.), មហោឃញ្ច (ក.), មហាទានំ (?)] ករិត្វាន, និយ្យាទេសិំ មហេសិនោ.

១០០. ‘‘អនុមោទិ មហាវីរោ, សយម្ភូ អគ្គបុគ្គលោ;

សព្ពេ ជនេ ហាសយន្តោ, ទេសេសិ អមតំ បទំ.

១០១. ‘‘តំ មេ ពុទ្ធោ វិយាកាសិ, ជលជុត្តរនាមកោ;

ភិក្ខុសង្ឃេ និសីទិត្វា, ឥមា គាថា អភាសថ.

១០២. ‘‘‘ចតុបញ្ញាសសហស្សានិ, បាសាទេ ការយី អយំ;

កថយិស្សាមិ វិបាកំ, សុណោថ មម ភាសតោ.

១០៣. ‘‘‘អដ្ឋារសសហស្សានិ, កូដាគារា ភវិស្សរេ;

ព្យម្ហុត្តមម្ហិ និព្ពត្តា, សព្ពសោណ្ណមយា ច តេ.

១០៤. ‘‘‘បញ្ញាសក្ខត្តុំ ទេវិន្ទោ, ទេវរជ្ជំ ករិស្សតិ;

អដ្ឋបញ្ញាសក្ខត្តុញ្ច, ចក្កវត្តី ភវិស្សតិ.

១០៥. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

១០៦. ‘‘‘ទេវលោកា ចវិត្វាន, សុក្កមូលេន ចោទិតោ;

អឌ្ឍេ កុលេ មហាភោគេ, និព្ពត្តិស្សតិ តាវទេ.

១០៧. ‘‘‘សោ បច្ឆា បព្ពជិត្វាន, សុក្កមូលេន ចោទិតោ;

រដ្ឋបាលោតិ នាមេន, ហេស្សតិ សត្ថុ សាវកោ.

១០៨. ‘‘‘បធានបហិតត្តោ សោ, ឧបសន្តោ និរូបធិ;

សព្ពាសវេ បរិញ្ញាយ, និព្ពាយិស្សតិនាសវោ’.

១០៩. ‘‘ឧដ្ឋាយ អភិនិក្ខម្ម, ជហិតា ភោគសម្បទា;

ខេឡបិណ្ឌេវ ភោគម្ហិ, បេមំ មយ្ហំ ន វិជ្ជតិ.

១១០. ‘‘វីរិយំ មេ ធុរធោរយ្ហំ, យោគក្ខេមាធិវាហនំ;

ធារេមិ អន្តិមំ ទេហំ, សម្មាសម្ពុទ្ធសាសនេ.

១១១. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា រដ្ឋបាលោ ថេរោ ឥមា គាថាយោ អភាសិត្ថាតិ.

រដ្ឋបាលត្ថេរស្សាបទានំ អដ្ឋមំ.