៦. រាហុលត្ថេរអបទានំ

៦៨. ‘‘បទុមុត្តរស្ស ភគវតោ, លោកជេដ្ឋស្ស តាទិនោ;

សត្តភូមម្ហិ បាសាទេ, អាទាសំ សន្ថរិំ អហំ.

៦៩. ‘‘ខីណាសវសហស្សេហិ, បរិកិណ្ណោ មហាមុនិ;

ឧបាគមិ គន្ធកុដិំ, ទ្វិបទិន្ទោ [ទិបទិន្ទោ (សី. ស្យា.)] នរាសភោ.

៧០. ‘‘វិរោចេន្តោ [វិរោចយំ (ស្យា.)] គន្ធកុដិំ, ទេវទេវោ នរាសភោ;

ភិក្ខុសង្ឃេ ឋិតោ សត្ថា, ឥមា គាថា អភាសថ.

៧១. ‘‘‘យេនាយំ ជោតិតា សេយ្យា, អាទាសោវ សុសន្ថតោ;

តមហំ កិត្តយិស្សាមិ, សុណាថ មម ភាសតោ.

៧២. ‘‘‘សោណ្ណមយា រូបិមយា, អថោ វេឡុរិយាមយា;

និព្ពត្តិស្សន្តិ បាសាទា, យេ កេចិ មនសោ បិយា.

៧៣. ‘‘‘ចតុសដ្ឋិក្ខត្តុំ ទេវិន្ទោ, ទេវរជ្ជំ ករិស្សតិ;

សហស្សក្ខត្តុំ ចក្កវត្តី, ភវិស្សតិ អនន្តរា.

៧៤. ‘‘‘ឯកវីសតិកប្បម្ហិ, វិមលោ នាម ខត្តិយោ;

ចាតុរន្តោ វិជិតាវី, ចក្កវត្តី ភវិស្សតិ.

៧៥. ‘‘‘នគរំ រេណុវតី នាម, ឥដ្ឋកាហិ សុមាបិតំ;

អាយាមតោ តីណិ សតំ, ចតុរស្សសមាយុតំ.

៧៦. ‘‘‘សុទស្សនោ នាម បាសាទោ, វិស្សកម្មេន មាបិតោ [វិសុកម្មេន§មាបិតោ (ក.), វិស្សកម្មេន និម្មិតោ (សី.)];

កូដាគារវរូបេតោ, សត្តរតនភូសិតោ.

៧៧. ‘‘‘ទសសទ្ទាវិវិត្តំ តំ [អវិវិត្តំ (សី.)], វិជ្ជាធរសមាកុលំ;

សុទស្សនំវ នគរំ, ទេវតានំ ភវិស្សតិ.

៧៨. ‘‘‘បភា និគ្គច្ឆតេ តស្ស, ឧគ្គច្ឆន្តេវ សូរិយេ;

វិរោចេស្សតិ តំ និច្ចំ, សមន្តា អដ្ឋយោជនំ.

៧៩. ‘‘‘កប្បសតសហស្សម្ហិ, ឱក្កាកកុលសម្ភវោ;

គោតមោ នាម គោត្តេន, សត្ថា លោកេ ភវិស្សតិ.

៨០. ‘‘‘តុសិតា សោ ចវិត្វាន, សុក្កមូលេន ចោទិតោ;

គោតមស្ស ភគវតោ, អត្រជោ សោ ភវិស្សតិ.

៨១. ‘‘‘សចេ វសេយ្យ [សចា’វសេយ្យ (?)] អគារំ, ចក្កវត្តី ភវេយ្យ សោ;

អដ្ឋានមេតំ យំ តាទី, អគារេ រតិមជ្ឈគា.

៨២. ‘‘‘និក្ខមិត្វា អគារម្ហា, បព្ពជិស្សតិ សុព្ពតោ;

រាហុលោ នាម នាមេន, អរហា សោ ភវិស្សតិ’.

៨៣. ‘‘កិកីវ អណ្ឌំ រក្ខេយ្យ, ចាមរី វិយ វាលធិំ;

និបកោ សីលសម្បន្នោ, មមំ រក្ខិ មហាមុនិ [ឯវំ រក្ខិំ មហាមុនិ (សី. ក.), មមំ ទក្ខិ មហាមុនិ (ស្យា.)].

៨៤. ‘‘តស្សាហំ ធម្មមញ្ញាយ, វិហាសិំ សាសនេ រតោ;

សព្ពាសវេ បរិញ្ញាយ, វិហរាមិ អនាសវោ.

៨៥. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា រាហុលោ ថេរោ ឥមា គាថាយោ អភាសិត្ថាតិ.

រាហុលត្ថេរស្សាបទានំ ឆដ្ឋំ.