៨. មិញ្ជវដំសកិយត្ថេរអបទានំ

៣៩. ‘‘និព្ពុតេ លោកនាថម្ហិ, សិខិម្ហិ វទតំ វរេ;

វដំសកេហិ អាកិណ្ណំ, ពោធិបូជំ អកាសហំ.

៤០. ‘‘ឯកត្តិំសេ ឥតោ កប្បេ, យំ បូជមករិំ តទា;

ទុគ្គតិំ នាភិជានាមិ, ពោធិបូជាយិទំ ផលំ.

៤១. ‘‘ឥតោ ឆព្ពីសតិកប្បេ, អហុំ មេឃព្ភនាមកោ;

សត្តរតនសម្បន្នោ, ចក្កវត្តី មហព្ពលោ.

៤២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មិញ្ជវដំសកិយោ ថេរោ ឥមា គាថាយោ អភាសិត្ថាតិ.

មិញ្ជវដំសកិយត្ថេរស្សាបទានំ អដ្ឋមំ.