៧. សោវណ្ណវដំសកិយត្ថេរអបទានំ

៣៤. ‘‘ឧយ្យានភូមិំ និយ្យន្តោ, អទ្ទសំ លោកនាយកំ;

វដំសកំ គហេត្វាន, សោវណ្ណំ សាធុនិម្មិតំ.

៣៥. ‘‘សីឃំ តតោ សមារុយ្ហ, ហត្ថិក្ខន្ធគតោ អហំ;

ពុទ្ធស្ស អភិរោបេសិំ, សិខិនោ លោកពន្ធុនោ.

៣៦. ‘‘ឯកត្តិំសេ ឥតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផបូជាយិទំ ផលំ.

៣៧. ‘‘សត្តវីសេ ឥតោ កប្បេ, ឯកោ អាសិំ ជនាធិបោ;

មហាបតាបនាមេន, ចក្កវត្តី មហព្ពលោ.

៣៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សោវណ្ណវដំសកិយោ ថេរោ ឥមា គាថាយោ អភាសិត្ថាតិ.

សោវណ្ណវដំសកិយត្ថេរស្សាបទានំ សត្តមំ.