៦. អង្កោលបុប្ផិយត្ថេរអបទានំ

២៩. ‘‘នារទោ [វរទោ (ក.)] ឥតិ មេ នាមំ, កស្សបោ ឥតិ មំ វិទូ;

អទ្ទសំ សមណានគ្គំ, វិបស្សិំ ទេវសក្កតំ.

៣០. ‘‘អនុព្យញ្ជនធរំ ពុទ្ធំ, អាហុតីនំ បដិគ្គហំ;

អង្កោលបុប្ផំ [វកុលបុប្ផំ (ស្យា.), ពកោលបុប្ផំ (ក.)] បគ្គយ្ហ, ពុទ្ធស្ស អភិរោបយិំ.

៣១. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣២. ‘‘ចតុសត្តតិតោ កប្បេ, រោមសោ នាម ខត្តិយោ;

អាមុក្កមាលាភរណោ, សយោគ្គពលវាហនោ.

៣៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អង្កោលបុប្ផិយោ [វកុលបុប្ផិយោ (ស្យា.), ពកោលបុប្ផិយោ (ក.)] ថេរោ ឥមា គាថាយោ អភាសិត្ថាតិ.

អង្កោលបុប្ផិយត្ថេរស្សាបទានំ ឆដ្ឋំ.