៥. អព្យាធិកត្ថេរអបទានំ

២៤. ‘‘វិបស្សិស្ស ភគវតោ, អគ្គិសាលំ អទាសហំ;

ព្យាធិកានញ្ច អាវាសំ, ឧណ្ហោទកបដិគ្គហំ.

២៥. ‘‘តេន កម្មេនយំ មយ្ហំ, អត្តភាវោ សុនិម្មិតោ;

ព្យាធាហំ នាភិជានាមិ, បុញ្ញកម្មស្សិទំ ផលំ.

២៦. ‘‘ឯកនវុតិតោ កប្បេ, យំ សាលមទទិំ តទា;

ទុគ្គតិំ នាភិជានាមិ, អគ្គិសាលាយិទំ ផលំ.

២៧. ‘‘ឥតោ ច សត្តមេ កប្បេ, ឯកោសិំ អបរាជិតោ [ឯកោ អាសិំ នរាធិបោ (ស្យា.)];

សត្តរតនសម្បន្នោ, ចក្កវត្តី មហព្ពលោ.

២៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា អព្យាធិកោ ថេរោ ឥមា គាថាយោ អភាសិត្ថាតិ.

អព្យាធិកត្ថេរស្សាបទានំ បញ្ចមំ.