១០. សុមង្គលត្ថេរអបទានំ

១២៤. ‘‘អាហុតិំ យិដ្ឋុកាមោហំ, បដិយាទេត្វាន ភោជនំ;

ព្រាហ្មណេ បដិមានេន្តោ, វិសាលេ មាឡកេ ឋិតោ.

១២៥. ‘‘អថទ្ទសាសិំ សម្ពុទ្ធំ, បិយទស្សិំ មហាយសំ;

សព្ពលោកវិនេតារំ, សយម្ភុំ អគ្គបុគ្គលំ.

១២៦. ‘‘ភគវន្តំ ជុតិមន្តំ, សាវកេហិ បុរក្ខតំ;

អាទិច្ចមិវ រោចន្តំ, រថិយំ បដិបន្នកំ.

១២៧. ‘‘អញ្ជលិំ បគ្គហេត្វាន, សកំ ចិត្តំ បសាទយិំ;

មនសាវ និមន្តេសិំ, ‘អាគច្ឆតុ មហាមុនិ’.

១២៨. ‘‘មម សង្កប្បមញ្ញាយ, សត្ថា លោកេ អនុត្តរោ;

ខីណាសវសហស្សេហិ, មម ទ្វារំ ឧបាគមិ.

១២៩. ‘‘នមោ តេ បុរិសាជញ្ញ, នមោ តេ បុរិសុត្តម;

បាសាទំ អភិរូហិត្វា, សីហាសនេ និសីទតំ [និសីទ ត្វំ (សី.)].

១៣០. ‘‘ទន្តោ ទន្តបរិវារោ, តិណ្ណោ តារយតំ វរោ;

បាសាទំ អភិរូហិត្វា, និសីទិ បវរាសនេ.

១៣១. ‘‘យំ មេ អត្ថិ សកេ គេហេ, អាមិសំ បច្ចុបដ្ឋិតំ;

តាហំ ពុទ្ធស្ស បាទាសិំ, បសន្នោ សេហិ បាណិភិ.

១៣២. ‘‘បសន្នចិត្តោ សុមនោ, វេទជាតោ កតញ្ជលី;

ពុទ្ធសេដ្ឋំ នមស្សាមិ, អហោ ពុទ្ធស្សុឡារតា.

១៣៣. ‘‘អដ្ឋន្នំ បយិរូបាសតំ, ភុញ្ជំ ខីណាសវា ពហូ;

តុយ្ហេវេសោ អានុភាវោ, សរណំ តំ ឧបេមហំ.

១៣៤. ‘‘បិយទស្សី ច ភគវា, លោកជេដ្ឋោ នរាសភោ;

ភិក្ខុសង្ឃេ និសីទិត្វា, ឥមា គាថា អភាសថ.

១៣៥. ‘‘‘យោ សោ សង្ឃំ អភោជេសិ, ឧជុភូតំ សមាហិតំ;

តថាគតញ្ច សម្ពុទ្ធំ, សុណាថ មម ភាសតោ.

១៣៦. ‘‘‘សត្តវីសតិក្ខត្តុំ សោ, ទេវរជ្ជំ ករិស្សតិ;

សកកម្មាភិរទ្ធោ សោ, ទេវលោកេ រមិស្សតិ.

១៣៧. ‘‘‘ទស អដ្ឋ ចក្ខត្តុំ [ទសញ្ចដ្ឋក្ខត្ថុំ (សី.), ទស ចដ្ឋក្ខត្តុំ (ស្យា.)] សោ, ចក្កវត្តី ភវិស្សតិ;

បថព្យា រជ្ជំ បញ្ចសតំ, វសុធំ អាវសិស្សតិ’.

១៣៨. ‘‘អរញ្ញវនមោគ្គយ្ហ, កាននំ ព្យគ្ឃសេវិតំ;

បធានំ បទហិត្វាន, កិលេសា ឈាបិតា មយា.

១៣៩. ‘‘អដ្ឋារសេ កប្បសតេ, យំ ទានមទទិំ តទា;

ទុគ្គតិំ នាភិជានាមិ, ភត្តទានស្សិទំ ផលំ.

១៤០. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា សុមង្គលោ ថេរោ ឥមា គាថាយោ អភាសិត្ថាតិ.

សុមង្គលត្ថេរស្សាបទានំ ទសមំ.

តស្សុទ្ទានំ –

សីហាសនី ឯកថម្ភី, នន្ទោ ច ចូឡបន្ថកោ;

បិលិន្ទរាហុលោ ចេវ, វង្គន្តោ រដ្ឋបាលកោ.

សោបាកោ មង្គលោ ចេវ, ទសេវ ទុតិយេ វគ្គេ;

សតញ្ច អដ្ឋតិំស ច, គាថា ចេត្ថ បកាសិតា.

សីហាសនិយវគ្គោ ទុតិយោ.