១. អាលម្ពណទាយកត្ថេរអបទានំ

១. ‘‘អត្ថទស្សិស្ស ភគវតោ, លោកជេដ្ឋស្ស តាទិនោ;

អាលម្ពណំ មយា ទិន្នំ, ទ្វិបទិន្ទស្ស តាទិនោ.

២. ‘‘ធរណិំ បដិបជ្ជាមិ, វិបុលំ សាគរប្បរំ;

បាណេសុ ច ឥស្សរិយំ, វត្តេមិ វសុធាយ ច.

៣. ‘‘កិលេសា ឈាបិតា មយ្ហំ, ភវា សព្ពេ សមូហតា;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

៤. ‘‘ឥតោ ទ្វេសដ្ឋិកប្បម្ហិ, តយោ អាសិំសុ ខត្តិយា;

ឯកាបស្សិតនាមា តេ, ចក្កវត្តី មហព្ពលា.

៥. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា អាលម្ពណទាយកោ ថេរោ ឥមា គាថាយោ អភាសិត្ថាតិ.

អាលម្ពណទាយកត្ថេរស្សាបទានំ បឋមំ.