៨. តិកណ្ណិបុប្ផិយត្ថេរអបទានំ

៤៦. ‘‘ទេវភូតោ អហំ សន្តោ, អច្ឆរាហិ បុរក្ខតោ;

បុព្ពកម្មំ សរិត្វាន, ពុទ្ធសេដ្ឋំ អនុស្សរិំ.

៤៧. ‘‘តិកណ្ណិបុប្ផំ [កិំកណិបុប្ផំ (ក.)] បគ្គយ្ហ, សកំ ចិត្តំ បសាទយិំ;

ពុទ្ធម្ហិ អភិរោបេសិំ, វិបស្សិម្ហិ នរាសភេ.

៤៨. ‘‘ឯកនវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៤៩. ‘‘តេសត្តតិម្ហិតោ កប្បេ, ចតុរាសុំ រមុត្តមា;

សត្តរតនសម្បន្នា, ចក្កវត្តី មហព្ពលា.

៥០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិកណ្ណិបុប្ផិយោ [កិំកណិកបុប្ផិយោ (ក.)] ថេរោ ឥមា គាថាយោ អភាសិត្ថាតិ.

តិកណ្ណិបុប្ផិយត្ថេរស្សាបទានំ អដ្ឋមំ.