៩. ឯកចារិយត្ថេរអបទានំ

៥១. ‘‘តាវតិំសេសុ ទេវេសុ, មហាឃោសោ តទា អហុ;

ពុទ្ធោ ច លោកេ និព្ពាតិ, មយញ្ចម្ហ សរាគិនោ.

៥២. ‘‘តេសំ សំវេគជាតានំ, សោកសល្លសមង្គិនំ;

សពលេន ឧបត្ថទ្ធោ, អគមំ ពុទ្ធសន្តិកំ.

៥៣. ‘‘មន្ទារវំ គហេត្វាន, សង្គីតិ [សណ្ហិតំ (សី.), សង្គិតំ (ស្យា.)] អភិនិម្មិតំ;

បរិនិព្ពុតកាលម្ហិ, ពុទ្ធស្ស អភិរោបយិំ.

៥៤. ‘‘សព្ពេ ទេវានុមោទិំសុ, អច្ឆរាយោ ច មេ តទា;

កប្បានំ សតសហស្សំ, ទុគ្គតិំ នុបបជ្ជហំ.

៥៥. ‘‘សដ្ឋិកប្បសហស្សម្ហិ, ឥតោ សោឡស តេ ជនា;

មហាមល្លជនា នាម, ចក្កវត្តី មហព្ពលា.

៥៦. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកចារិយោ ថេរោ ឥមា គាថាយោ អភាសិត្ថាតិ.

ឯកចារិយត្ថេរស្សាបទានំ នវមំ.