៥. សីហាសនទាយកត្ថេរអបទានំ

២១. ‘‘និព្ពុតេ លោកនាថម្ហិ, បទុមុត្តរនាយកេ;

បសន្នចិត្តោ សុមនោ, សីហាសនមទាសហំ.

២២. ‘‘ពហូហិ គន្ធមាលេហិ, ទិដ្ឋធម្មសុខាវហេ;

តត្ថ បូជញ្ច កត្វាន, និព្ពាយតិ ពហុជ្ជនោ.

២៣. ‘‘បសន្នចិត្តោ សុមនោ, វន្ទិត្វា ពោធិមុត្តមំ;

កប្បានំ សតសហស្សំ, ទុគ្គតិំ នុបបជ្ជហំ.

២៤. ‘‘បន្នរសសហស្សម្ហិ, កប្បានំ អដ្ឋ អាសុ តេ [អដ្ឋ អាសយុំ (ក.)];

សិលុច្ចយសនាមា ច, រាជានោ ចក្កវត្តិនោ.

២៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សីហាសនទាយកោ ថេរោ ឥមា គាថាយោ អភាសិត្ថាតិ;

សីហាសនទាយកត្ថេរស្សាបទានំ បញ្ចមំ.