១៨. កុមុទវគ្គោ

១. កុមុទមាលិយត្ថេរអបទានំ

១. ‘‘បព្ពតេ ហិមវន្តម្ហិ, មហាជាតស្សរោ អហុ;

តត្ថជោ រក្ខសោ អាសិំ, ឃោររូបោ មហព្ពលោ.

២. ‘‘កុមុទំ បុប្ផតេ តត្ថ, ចក្កមត្តានិ ជាយរេ;

ឱចិនាមិ ច តំ បុប្ផំ, ពលិនោ សមិតិំ តទា.

៣. ‘‘អត្ថទស្សី តុ ភគវា, ទ្វិបទិន្ទោ នរាសភោ;

បុប្ផសង្កោចិតំ [បុប្ផំ សង្កោចិតំ (សី. ស្យា.), បុប្ផំ សមោចិតំ (?)] ទិស្វា, អាគច្ឆិ មម សន្តិកំ.

៤. ‘‘ឧបាគតញ្ច សម្ពុទ្ធំ, ទេវទេវំ នរាសភំ;

សព្ពញ្ច បុប្ផំ បគ្គយ្ហ, ពុទ្ធស្ស អភិរោបយិំ.

៥. ‘‘យាវតា ហិមវន្តន្តា, បរិសា សា [ហិមវន្តស្មិំ, យាវ មាលា (ស្យា.)] តទា អហុ;

តាវច្ឆទនសម្បន្នោ, អគមាសិ តថាគតោ.

៦. ‘‘អដ្ឋារសេ កប្បសតេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៧. ‘‘ឥតោ បន្នរសេ កប្បេ, សត្តាហេសុំ ជនាធិបា;

សហស្សរថនាមា តេ, ចក្កវត្តី មហព្ពលា.

៨. ‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;

ឆឡភិញ្ញា សច្ឆិកតា, កតំ ពុទ្ធស្ស សាសនំ’’.

ឥត្ថំ សុទំ អាយស្មា កុមុទមាលិយោ ថេរោ ឥមា គាថាយោ អភាសិត្ថាតិ.

កុមុទមាលិយត្ថេរស្សាបទានំ បឋមំ.

២. និស្សេណិទាយកត្ថេរអបទានំ

៩. ‘‘កោណ្ឌញ្ញស្ស ភគវតោ, លោកជេដ្ឋស្ស តាទិនោ;

អារោហត្ថាយ បាសាទំ, និស្សេណី ការិតា មយា.

១០. ‘‘តេន ចិត្តប្បសាទេន, អនុភោត្វាន សម្បទា;

ធារេមិ អន្តិមំ ទេហំ, សម្មាសម្ពុទ្ធសាសនេ.

១១. ‘‘ឯកត្តិំសម្ហិ កប្បានំ, សហស្សម្ហិ តយោ អហុំ [មហា (សី. ស្យា.)];

សម្ពហុលា នាម រាជានោ, ចក្កវត្តី មហព្ពលា.

១២. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា និស្សេណិទាយកោ ថេរោ ឥមា គាថាយោ អភាសិត្ថាតិ.

និស្សេណិទាយកត្ថេរស្សាបទានំ ទុតិយំ.

៣. រត្តិបុប្ផិយត្ថេរអបទានំ

១៣. ‘‘មិគលុទ្ទោ បុរេ អាសិំ, អរញ្ញេ កាននេ អហំ;

វិបស្សិំ អទ្ទសំ ពុទ្ធំ, ទេវទេវំ នរាសភំ.

១៤. ‘‘រត្តិកំ បុប្ផិតំ ទិស្វា, កុដជំ ធរណីរុហំ;

សមូលំ បគ្គហេត្វាន, ឧបនេសិំ មហេសិនោ.

១៥. ‘‘ឯកនវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, បុប្ផទានស្សិទំ ផលំ.

១៦. ‘‘ឥតោ ច អដ្ឋមេ កប្បេ, សុប្បសន្នសនាមកោ;

សត្តរតនសម្បន្នោ, រាជាហោសិំ មហព្ពលោ.

១៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា រត្តិបុប្ផិយោ ថេរោ ឥមា គាថាយោ អភាសិត្ថាតិ.

រត្តិបុប្ផិយត្ថេរស្សាបទានំ តតិយំ.

៤. ឧទបានទាយកត្ថេរអបទានំ

១៨. ‘‘វិបស្សិនោ ភគវតោ, ឧទបានោ កតោ មយា;

បិណ្ឌបាតញ្ច ទត្វាន [គហេត្វាន (ស្យា.)], និយ្យាទេសិមហំ តទា.

១៩. ‘‘ឯកនវុតិតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ឧទបានស្សិទំ ផលំ.

២០. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឧទបានទាយកោ ថេរោ ឥមា គាថាយោ អភាសិត្ថាតិ.

ឧទបានទាយកត្ថេរស្សាបទានំ ចតុត្ថំ.

៥. សីហាសនទាយកត្ថេរអបទានំ

២១. ‘‘និព្ពុតេ លោកនាថម្ហិ, បទុមុត្តរនាយកេ;

បសន្នចិត្តោ សុមនោ, សីហាសនមទាសហំ.

២២. ‘‘ពហូហិ គន្ធមាលេហិ, ទិដ្ឋធម្មសុខាវហេ;

តត្ថ បូជញ្ច កត្វាន, និព្ពាយតិ ពហុជ្ជនោ.

២៣. ‘‘បសន្នចិត្តោ សុមនោ, វន្ទិត្វា ពោធិមុត្តមំ;

កប្បានំ សតសហស្សំ, ទុគ្គតិំ នុបបជ្ជហំ.

២៤. ‘‘បន្នរសសហស្សម្ហិ, កប្បានំ អដ្ឋ អាសុ តេ [អដ្ឋ អាសយុំ (ក.)];

សិលុច្ចយសនាមា ច, រាជានោ ចក្កវត្តិនោ.

២៥. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សីហាសនទាយកោ ថេរោ ឥមា គាថាយោ អភាសិត្ថាតិ;

សីហាសនទាយកត្ថេរស្សាបទានំ បញ្ចមំ.

៦. មគ្គទត្តិកត្ថេរអបទានំ

២៦. ‘‘អនោមទស្សី ភគវា, ទ្វិបទិន្ទោ នរាសភោ;

ទិដ្ឋធម្មសុខត្ថាយ, អព្ភោកាសម្ហិ ចង្កមិ.

២៧. ‘‘ឧទ្ធតេ បាទេ បុប្ផានិ, សោភំ មុទ្ធនិ តិដ្ឋរេ;

បសន្នចិត្តោ សុមនោ, វន្ទិត្វា បុប្ផមោកិរិំ.

២៨. ‘‘វីសកប្បសហស្សម្ហិ, ឥតោ បញ្ច ជនា អហុំ;

បុប្ផច្ឆទនិយា នាម, ចក្កវត្តី មហព្ពលា.

២៩. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មគ្គទត្តិកោ ថេរោ ឥមា គាថាយោ អភាសិត្ថាតិ.

មគ្គទត្តិកត្ថេរស្សាបទានំ ឆដ្ឋំ.

៧. ឯកទីបិយត្ថេរអបទានំ

៣០. ‘‘បទុមុត្តរស្ស មុនិនោ, សឡលេ ពោធិមុត្តមេ;

បសន្នចិត្តោ សុមនោ, ឯកទីបំ អទាសហំ.

៣១. ‘‘ភវេ និព្ពត្តមានម្ហិ, និព្ពត្តេ បុញ្ញសញ្ចយេ;

ទុគ្គតិំ នាភិជានាមិ, ទីបទានស្សិទំ ផលំ.

៣២. ‘‘សោឡសេ កប្បសហស្សេ, ឥតោ តេ ចតុរោ ជនា;

ចន្ទាភា នាម នាមេន, ចក្កវត្តី មហព្ពលា.

៣៣. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា ឯកទីបិយោ ថេរោ ឥមា គាថាយោ អភាសិត្ថាតិ.

ឯកទីបិយត្ថេរស្សាបទានំ សត្តមំ.

នវមំ ភាណវារំ.

៨. មណិបូជកត្ថេរអបទានំ

៣៤. ‘‘ឱរេន ហិមវន្តស្ស, នទិកា សម្បវត្តថ;

តស្សា ចានុបខេត្តម្ហិ, សយម្ភូ វសតេ តទា.

៣៥. ‘‘មណិំ បគ្គយ្ហ បល្លង្កំ, សាធុចិត្តំ មនោរមំ;

បសន្នចិត្តោ សុមនោ, ពុទ្ធស្ស អភិរោបយិំ.

៣៦. ‘‘ចតុន្នវុតិតោ កប្បេ, យំ មណិំ អភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៧. ‘‘ឥតោ ច ទ្វាទសេ កប្បេ, សតរំសីសនាមកា;

អដ្ឋ តេ អាសុំ រាជានោ, ចក្កវត្តី មហព្ពលា.

៣៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា មណិបូជកោ ថេរោ ឥមា គាថាយោ អភាសិត្ថាតិ.

មណិបូជកត្ថេរស្សាបទានំ អដ្ឋមំ.

៩. តិកិច្ឆកត្ថេរអបទានំ

៣៩. ‘‘នគរេ ពន្ធុមតិយា, វេជ្ជោ អាសិំ សុសិក្ខិតោ;

អាតុរានំ សទុក្ខានំ, មហាជនសុខាវហោ.

៤០. ‘‘ព្យាធិតំ សមណំ ទិស្វា, សីលវន្តំ មហាជុតិំ;

បសន្នចិត្តោ សុមនោ, ភេសជ្ជមទទិំ តទា.

៤១. ‘‘អរោគោ អាសិ តេនេវ, សមណោ សំវុតិន្ទ្រិយោ;

អសោកោ នាម នាមេន, ឧបដ្ឋាកោ វិបស្សិនោ.

៤២. ‘‘ឯកនវុតិតោ កប្បេ, យំ ឱសធមទាសហំ;

ទុគ្គតិំ នាភិជានាមិ, ភេសជ្ជស្ស ឥទំ ផលំ.

៤៣. ‘‘ឥតោ ច អដ្ឋមេ កប្បេ, សព្ពោសធសនាមកោ;

សត្តរតនសម្បន្នោ, ចក្កវត្តី មហព្ពលោ.

៤៤. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា តិកិច្ឆកោ ថេរោ ឥមា គាថាយោ អភាសិត្ថាតិ.

តិកិច្ឆកត្ថេរស្សាបទានំ នវមំ.

១០. សង្ឃុបដ្ឋាកត្ថេរអបទានំ

៤៥. ‘‘វេស្សភុម្ហិ ភគវតិ, អហោសារាមិកោ អហំ;

បសន្នចិត្តោ សុមនោ, ឧបដ្ឋិំ សង្ឃមុត្តមំ.

៤៦. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ឧបដ្ឋានស្សិទំ ផលំ.

៤៧. ‘‘ឥតោ តេ សត្តមេ កប្បេ, សត្តេវាសុំ សមោទកា;

សត្តរតនសម្បន្នា, ចក្កវត្តី មហព្ពលា.

៤៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សង្ឃុបដ្ឋាកោ ថេរោ ឥមា គាថាយោ អភាសិត្ថាតិ.

សង្ឃុបដ្ឋាកត្ថេរស្សាបទានំ ទសមំ.

កុមុទវគ្គោ អដ្ឋារសមោ.