១០. សង្ឃុបដ្ឋាកត្ថេរអបទានំ

៤៥. ‘‘វេស្សភុម្ហិ ភគវតិ, អហោសារាមិកោ អហំ;

បសន្នចិត្តោ សុមនោ, ឧបដ្ឋិំ សង្ឃមុត្តមំ.

៤៦. ‘‘ឯកត្តិំសេ ឥតោ កប្បេ, យំ កម្មមករិំ តទា;

ទុគ្គតិំ នាភិជានាមិ, ឧបដ្ឋានស្សិទំ ផលំ.

៤៧. ‘‘ឥតោ តេ សត្តមេ កប្បេ, សត្តេវាសុំ សមោទកា;

សត្តរតនសម្បន្នា, ចក្កវត្តី មហព្ពលា.

៤៨. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា សង្ឃុបដ្ឋាកោ ថេរោ ឥមា គាថាយោ អភាសិត្ថាតិ.

សង្ឃុបដ្ឋាកត្ថេរស្សាបទានំ ទសមំ.

កុមុទវគ្គោ អដ្ឋារសមោ.