៧. យូថិកបុប្ផិយត្ថេរអបទានំ

៣៣. ‘‘ចន្ទភាគានទីតីរេ, អនុសោតំ វជាមហំ;

សយម្ភុំ អទ្ទសំ តត្ថ, សាលរាជំវ ផុល្លិតំ.

៣៤. ‘‘បុប្ផំ យូថិកមាទាយ, ឧបគច្ឆិំ មហាមុនិំ;

បសន្នចិត្តោ សុមនោ, ពុទ្ធស្ស អភិរោបយិំ.

៣៥. ‘‘ចតុន្នវុតិតោ កប្បេ, យំ បុប្ផមភិរោបយិំ;

ទុគ្គតិំ នាភិជានាមិ, ពុទ្ធបូជាយិទំ ផលំ.

៣៦. ‘‘សត្តសដ្ឋិម្ហិតោ កប្បេ, ឯកោ សាមុទ្ធរោ អហុ;

សត្តរតនសម្បន្នោ, ចក្កវត្តី មហព្ពលោ.

៣៧. ‘‘បដិសម្ភិទា ចតស្សោ…បេ… កតំ ពុទ្ធស្ស សាសនំ’’.

ឥត្ថំ សុទំ អាយស្មា យូថិកបុប្ផិយោ ថេរោ ឥមា គាថាយោ អភាសិត្ថាតិ.

យូថិកបុប្ផិយត្ថេរស្សាបទានំ សត្តមំ.